തിരുവനന്തപുരം: വീടുകള് തോറും കയറിയിറങ്ങിയുള്ള പ്രചരണത്തിലായിരുന്നു വട്ടിയൂര്ക്കാവിലെ എന്ഡിഎ സ്ഥാനാര്ഥി അഡ്വ. എസ്. സുരേഷ്. രാവിലെ ഒന്പത് മണിയോടെ വലിയവിളയില് നിന്നാണ് ഗൃഹസമ്പര്ക്കം ആരംഭിച്ചത്.
ചിലര്ക്ക് സ്ഥാനാര്ഥി വീട്ടില് വന്നതിന്റെ സന്തോഷം, ചിലര്ക്ക് സ്ഥാനാര്ഥിയെ നേരില് കണ്ടതിന്റെയും. ”ഞങ്ങളുടെ എല്ലാവരുടേയും പ്രാര്ഥനയും അനുഗ്രഹവുമുണ്ട്. ഇത്തവണ വട്ടിയൂര്ക്കാവില് താമര വിരിയും.” ഇതാണ് വട്ടിയൂര്ക്കാവിലെ സമ്മതിദായകര്ക്ക് എന്ഡിഎ സ്ഥാനാര്ഥിയോട് പറയാനുണ്ടായിരുന്നത്. മണ്ഡലത്തിലെ പല വികസനമുരടിപ്പും അവര് എടുത്തുപറഞ്ഞു. ”ഞാന് എംഎല്എ ആയി വന്നാല് മാറ്റമുണ്ടാകും.” വര്ഷങ്ങളായി മുന് എംഎല്എയ്ക്ക് ചെയ്യാന് സാധിക്കാത്തത് ഒന്നര വര്ഷം കൊണ്ട് നടപ്പാക്കാമെന്ന ഉറപ്പാണ് സ്ഥാനാര്ഥി വോട്ടര്മാര്ക്ക് നല്കിയത്.
കഴിഞ്ഞ നിയമസഭാ തെരഞ്ഞെടുപ്പില് വട്ടിയൂര്ക്കാവ് മണ്ഡലത്തില് തുച്ഛമായ വോട്ടിന് രണ്ടാം സ്ഥാനത്തെത്തിയ കുമ്മനം രാജശേഖരനും മണ്ഡലത്തില് എന്ഡിഎ സ്ഥാനാര്ഥിക്കായി പ്രചരണത്തിനുണ്ട്. അമ്മമാരും കുട്ടികളും യുവാക്കളും ഉള്പ്പെടെ നിരവധിപേരാണ് തങ്ങളുടെ സ്ഥാനാര്ഥിയെക്കാണാന് ഓരോസ്ഥലത്തും കാത്തിരിക്കുന്നത്. ”ഇത്തവണ താമര വിരിയും, നമ്മള് ജയിക്കണം” എന്നുപറഞ്ഞ് മൂര്ദ്ധാവില് കൈവച്ച് അനുഗ്രഹിച്ചാണ് ഓരോരുത്തരും സുരേഷിനെ യാത്രയാക്കിയത്.
പൊരിവെയിലിനെ വകവയ്ക്കാതെ നിരവധി പ്രവര്ത്തകരാണ് സ്ഥാനാര്ഥിയ്ക്കൊപ്പം വീടുകള്തോറും കയറിയിറങ്ങി വോട്ട് തേടിയത്.
ഉച്ചയോടെ ചരിത്രസ്മരണകളുറങ്ങുന്ന കവടിയാറിലെ തിരുവിതാംകൂര് രാജകൊട്ടാരം സ്ഥാനാര്ഥി സന്ദര്ശിച്ചു. രാജകുടുംബാംഗങ്ങളായ പൂയം തിരുനാള് ഗൗരി പാര്വതീ ബായി, അശ്വതി തിരുനാള് ഗൗരി ലക്ഷ്മീ ബായി, ആദിത്യവര്മ എന്നിവര് ചേര്ന്ന് അദ്ദേഹത്തെ സ്വീകരിച്ചു. രാജകുടുംബാംഗങ്ങള് എല്ലാവിധ അനുഗ്രഹങ്ങളും ആശംസിച്ചു. ഉച്ചയ്ക്ക് ശേഷം പേരൂര്ക്കടയിലായിരുന്നു ഗൃഹസമ്പര്ക്കം.
കിണവൂരിലേയും ശാസ്തമംഗലത്തേയും ഏര്യാ കണ്വെന്ഷനുകളിലും അഡ്വ. എസ.് സുരേഷ് പങ്കെടുത്തു. നെട്ടയം ഏര്യാ കമ്മറ്റി ഓഫീസ് ഒ.രാജഗോപാല് എംഎല്എ ഉദ്ഘാടനം ചെയ്തു.
