ഭക്തന്റെ തൂക്കത്തിന് തുല്യമോ അതിലേറെയോ ദ്രവ്യം ക്ഷേത്രങ്ങളില്‍ ഭഗവാന് കാഴ്ചയായി സമര്‍പ്പിക്കുന്ന വഴിപാടാണ് തുലാഭാരം.
രോഗശാന്തി, ദുരിതമോചനം, അഭീഷ്ട സിദ്ധി എന്നിവയ്‌ക്കായാണ് തുലാഭാരം നടത്തുന്നത്. ഭഗവാന് കൃഷ്ണന് പത്‌നിയായ രുക്മിണീദേവി നല്‍കിയ വഴിപാടാണ് പുരാണങ്ങളില്‍ നിന്ന് ഭക്തര്‍ ജീവിതത്തിലേക്ക് പകര്‍ത്തിയ തുലാഭാരമെന്ന് പറയപ്പെടുന്നു. കൃഷ്ണനോടുള്ള ഭക്തിയുടെ ആഴം ബോധ്യപ്പെടുത്താന്‍ ദേവി രത്‌നങ്ങളും സ്വര്‍ണങ്ങളും വെച്ച് തുലാഭാരം നടത്തിയിട്ടും ഭഗവാന് ഇരുന്ന തട്ട് ഉയര്‍ന്നില്ല. ഒടുവില്‍ ദേവി സ്വയം സമര്‍പ്പണത്തോടെ നല്‍കിയ ഒരു ഒരു തുളസീദളമാണ് തട്ട് ഉയര്‍ത്തിയത്. ഭാഗവത പുരാണത്തിലാണ് തുലാഭാരത്തെക്കുറിച്ച് പരാമര്‍ശമുള്ളത്.
ഓരോരുത്തരും തങ്ങളുടെ ഇച്ഛാനുസരണമാണ് തുലാഭാരത്തിന് ദ്രവ്യങ്ങള്‍ സമര്‍പ്പിക്കുന്നത്. പട്ടിണി മാറാന്‍ നെല്ലും മലരും ദ്രവ്യമായി ഉപയോഗിക്കാം. വയറുമായി ബന്ധപ്പെട്ട അസുഖങ്ങള്‍ക്ക് ശര്‍ക്കര കൊണ്ട് തുലാഭാരമാകാം. പ്രമേഹം ശമിക്കാന്‍ പഞ്ചസാരയും രോഗശാന്തിക്ക് കദളിപ്പഴവും ശനിദോഷത്തിന് എള്ളും ഉപയോഗിക്കാവുന്നതാണ്. വ്യാപാരാഭിവൃദ്ധിക്ക് നാണയം കൊണ്ട് തുലാഭാരം നടത്തുന്ന പതിവുണ്ട്. ചേന ദ്രവ്യമായി ഉപയോഗിച്ചാല്‍ ത്വഗ്‌രോഗം മാറും. അഭീഷ്ടസിദ്ധിക്ക് തട്ടില്‍ വെയ്‌ക്കാന്‍ നല്ലത് താമരപ്പൂവാണ്. മനോരോഗമുക്തിക്ക് നെല്ലിക്കയും വാളന്‍പുളിയും കൊണ്ട് തുലാഭാരം നടത്താറുണ്ട്.
