ന്യൂദല്ഹി : മരട് ഫ്ളാറ്റ് പൊളിക്കുന്നതുമായി ബന്ധപ്പെട്ട ചീഫ് സെക്രട്ടറി ടോം ജോസിന് സുപ്രീംകോടതിയുടെ രൂക്ഷവിമര്ശനം. കേരളത്തിലുണ്ടായ പ്രളയത്തെക്കുറിച്ച് അറിയില്ലേ എന്ന് ചോദിച്ച കോടതി പ്രളയത്തില്പ്പെട്ട ജനങ്ങളെ പുനരധിവസിപ്പിക്കാന് സാര്ക്കാരിന് ഇതുവരെ സാധിച്ചിട്ടില്ല. എന്നിട്ടും നിയമലംഘനത്തിനെ പിന്തുണയ്ക്കുകയാണോയെന്നും സുപ്രീംകോടതി ശകാരിച്ചു. കേസില് വിശദമായ ഉത്തരവുണ്ടാകുമെന്നും കോടതി വ്യക്തമാക്കി.
കേസ് പരിഗണിച്ച ഉടന് ചീഫ് സെക്രട്ടറി എവിടെ.. വിളിക്കൂ എന്ന് ജസ്റ്റിസ് അരുണ് മിശ്ര ആവശ്യപ്പെടുകയായിരുന്നു. ചീഫ് സെക്രട്ടറിക്കൊപ്പം അഡീഷണല് ചീഫ് സെക്രട്ടറി ഉഷാ ടൈറ്റസും കോടതിയില് ഹാജരായിരുന്നു.
സുപ്രീംകോടതിയുടെ ഉത്തരവ് പാലിക്കാന് സംസ്ഥാന സര്ക്കാരിന് താത്പ്പര്യമില്ലെന്ന് കേസ് പരിഗണിച്ച ജസ്റ്റിസ് അരുണ് മിശ്രയുടെ നേതൃത്വത്തിലുള്ള ഡിവിഷന് ബെഞ്ച് വ്യക്തമാക്കി. സത്യവാങ്മൂലത്തില് ഇത് വ്യക്തമാണ്. കേരളത്തിലുണ്ടായ പ്രളയത്തില് രാജ്യം മുഴുവന് ഒറ്റക്കെട്ടായി സംസ്ഥാനത്തിനൊപ്പം നിന്നു. സുപ്രീംകോടതിയടക്കം കേരളത്തിനൊപ്പം നിന്നു, സഹായം നല്കി. എന്നിട്ടും കേരളം പഠിക്കുന്നില്ലെന്ന് ജസ്റ്റിസ് അരുണ് മിശ്ര കുറ്റപ്പെടുത്തി.
ഫ്ളാറ്റുകള് പൊളിച്ചു നീക്കാന് എത്രസമയം വേണമെന്ന് കോടതി ചീഫ് സെക്രട്ടറിയോട് വിശദീകരണം തേടി. കേരളത്തിന്റെ നിലപാട് ഞെട്ടല് ഉളവാക്കുന്നു എന്നും അറിയിച്ചു. നിയമലംഘകരെ സംരക്ഷിക്കുകയാണോ കേരളമെന്നും കോടതി ചോദിച്ചു. ഉത്തരവിറക്കി മൂന്ന് മാസമായിട്ടും കേരളത്തിന്റെ ഭാഗത്തു നിന്നും നടപടിയൊന്നും ഉണ്ടായിട്ടില്ല. ഫ്ളാറ്റിലുള്ള 343 കുടുംബങ്ങളെയെങ്കിലും രക്ഷിക്കാനാണ് ഞങ്ങള് ശ്രമിക്കുന്നത്. സംസ്ഥാനം ഈ സമീപനം തന്നെയാണ് തുടരുന്നതെങ്കില് സ്ഥിതി ഗുരുതരമായിരിക്കുമെന്നും ജസ്റ്റിസ് അരുണ് മിശ്ര അറിയിച്ചു.
ഇന്നുതന്നെ കേസില് ഉത്തരവിറക്കാനാണ് സുപ്രീംകോടതി തീരുമാനിച്ചത്. എന്നാല് വെള്ളിയാഴ്ചത്തേക്ക് മാറ്റണമെന്ന് സര്ക്കാരിന് വേണ്ടി ഹാജരായ ഹരീഷ് സാല്വേയുടെ അഭ്യര്ത്ഥനയില് ഇത് മാറ്റി. എന്നാല് സുപ്രീംകോടതിയുടെ രൂക്ഷവിമര്ശനത്തില് പ്രതികരിക്കാനില്ലെന്നാണ് ചീഫ് സെക്രട്ടറി പ്രതികരിച്ചത്. സുപ്രീംകോടതിയുടെ വിധി വരട്ടെ, അതിന് ശേഷമേ പ്രതികരിക്കൂ. സുപ്രീംകോടതിയുടെ ഉത്തരവ് പാലിക്കാന് സര്ക്കാര് ബാധ്യസ്ഥരാണെന്നും അദ്ദേഹം കൂട്ടിച്ചേര്ത്തു.
