ന്യൂദല്ഹി: വന് ഭീകരാക്രമണം ലക്ഷ്യമിട്ട് ആറ് ലക്ഷ്കര് ഭീകരർ ശ്രീലങ്ക വഴി തമിഴ്നാട്ടിലേക്ക് കടക്കുന്നതായി രഹസ്യാന്വേഷണ ഏജന്സികളുടെ മുന്നറിയിപ്പ്. അഞ്ച് ശ്രിലങ്കന് തമിഴ് വംശജരും ഒരു പാക്കിസ്ഥാന് സ്വദേശിയുമുള്പ്പെടുന്ന സംഘം തമിഴ്നാട്ടിലെ കോയമ്പത്തൂരില് എത്തിയെന്നാണ് ഇന്റലിജന്സ് നല്കുന്ന നിര്ണായക വിവരം. ഇതിനെ തുടര്ന്ന് പ്രദേശത്ത് അതീവ ജാഗ്രത പാലിക്കാന് സുരക്ഷാ സേനയ്ക്ക് നിര്ദ്ദേശം നല്കി.
മുന്നറിയിപ്പിനെ തുടര്ന്ന് ചെന്നൈയിലും സംസ്ഥാനത്തിന്റെ തന്ത്രപ്രധാന മേഖലകളിലും കൂടുതല് സുരക്ഷാ ഉദ്യോഗസ്ഥരെ വിന്യസിച്ചിട്ടുണ്ട്. വേണ്ടത്ര മുന്കരുതലുകള് സ്വീകരിച്ചിട്ടുണ്ടെന്നും കൂടുതല് സുരക്ഷാ ഉദ്യോഗസ്ഥരെ പരിസരത്തും പ്രദേശത്തും വിന്യസിച്ചിട്ടുണ്ടെന്ന് ചെന്നെ പോലീസ് കമ്മിഷണര് അറിയിച്ചു. അഫ്ഗാന് ഭീകരരെ കശ്മീരില് വിന്യസിക്കാന് പാക്കിസ്ഥാന് പദ്ധതിയിടുന്നതായി നേരത്തെ രഹസ്യാന്വേഷണ റിപ്പോര്ട്ടുകള് ഉണ്ടായിരുന്നു.
ജമ്മുകശ്മീരിന് പ്രത്യേക അധികാരം നല്കുന്ന ആര്ട്ടിക്കിള് 370 റദ്ദാക്കിയതോടെ പാക് അധിനിവേശ കാശ്മീരില് ഭീകരർ നുഴഞ്ഞുകയറാന് തയ്യാറെടുക്കുന്നതായിരുന്നു റിപ്പോര്ട്ട്.
