ന്യുദല്‍ഹി: യൂണിസെഫ് ഗുഡ്വില്‍ അംബാസഡര്‍ സ്ഥാനത്തു നിന്നും പ്രിയങ്ക ചോപ്രയെ നീക്കം ചെയ്യണം എന്ന് ആവശ്യപ്പെട്ട് പാക്കിസ്ഥാന് ഐക്യരാഷ്‌ട്രസഭയ്‌ക്ക് കത്തയച്ചു. കശ്മീര്‍ വിഷയത്തില്‍ ഇന്ത്യന്‍ സര്‍ക്കാര്‍ നിലപാടിനെ പ്രിയങ്ക പരസ്യമായി അംഗീകരിക്കുകയും ഇന്ത്യന്‍ പ്രതിരോധമന്ത്രി രാജ്‌നാഥ സിംങ്ങ് പാക്കിസ്ഥാന് നല്‍കിയ താകീതിനെ പിന്‍തുണക്കുകയും ചെയ്തു. ഐക്യരാഷ്‌ട്രസഭയുടെ ഗുഡ്വില്‍ അംബാസഡര്‍ സ്ഥാനത്തു നില്‍ക്കുമ്പോള്‍ പ്രിയങ്ക ഉയര്‍ത്തിപിടിക്കേണ്ട സമാധാനത്തിന്റെയും സൗഹാര്‍ദ്ദത്തിന്റെയും തത്വങ്ങളാണെന്ന് ചൂണ്ടിക്കാട്ടിയാണ് പാക്ക് മനുഷ്യാവകാശ വകുപ്പ് മന്ത്രി ഷിരിന്‍ മസാരിയാണ് കത്തയച്ചത്
പ്രധാനമന്തി നരേന്ദ്ര മോദിയേയും കേന്ദ്ര സര്‍ക്കാറിനെയും അവഹേളിച്ചുകൊണ്ടുള്ള കത്തില്‍ പ്രിയങ്കയുടെ പദവിയെയും ചോദ്യം ചെയ്യുന്നു.ബിജെപി സര്‍ക്കാരിന്റെ എല്ലാ നയങ്ങളും വംശീയ ഉന്മൂലനം, വംശീയത, ഫാസിസം, വംശഹത്യ എന്നിവ സംബന്ധിച്ച നാസി സിദ്ധാന്തത്തിന് സമാനമാണെന്നും. ഇന്ത്യന്‍ സര്‍ക്കാര്‍ നിലപാടിനെ പ്രിയങ്ക ചോപ്ര പരസ്യമായി അംഗീകരിക്കുകയും ഇന്ത്യന്‍ പ്രതിരോധ മന്ത്രി പാകിസ്ഥാന് നല്‍കിയ ആണവ ഭീഷണിയെ പിന്തുണയ്‌ക്കുകയും ചെയ്‌തെന്നും കത്തില്‍ പറയുന്നു.
സമാധാനത്തിനായുള്ള ഐക്യരാഷ്‌ട്രസഭയുടെ ഗുഡ്വില്‍ അംബാസഡര്‍ എന്ന നിലയില്‍ പ്രിയങ്ക ഉയര്‍ത്തിപ്പിടിക്കേണ്ട സമാധാനത്തിന്റെയും സല്‍സ്വഭാവത്തിന്റെയും തത്വങ്ങള്‍ക്ക് വിരുദ്ധമാണ് ഇതെല്ലാം. തല്‍സ്ഥാനത്ത് നിന്ന് പ്രിയങ്കയെ നീക്കം ചെയ്തില്ലെങ്കില്‍ അത് സമാധാനത്തിന്റെ ഗുഡ്വില്‍ അംബാസഡര്‍ എന്ന ആശയത്തെ ആഗോളതലത്തില്‍ തന്നെ പരിഹാസ്യമാക്കി തീര്‍ക്കുമെന്നും ഷിരിന്‍ മസായി വ്യക്തമാക്കി.
ഫെബ്രുവരി 26 ന് പാക്കിസ്ഥാനിലെ ബാലാക്കോട്ടില്‍ ജെയ്‌ഷെ മുഹമ്മദ് ഭീകരവാദി ക്യാമ്പിലേക്ക് ഇന്ത്യ നടത്തിയ വ്യോമാക്രമണത്തെ പ്രിയങ്ക ചോപ്ര അഭിനന്ദിച്ചിരുന്നു. ഇതേ തുടര്‍ന്നും യൂണിസെഫ് ഗുഡ്വില്‍ അംബാസഡര്‍ സ്ഥാനത്തു നിന്ന് പ്രിയങ്കയെ നീക്കം ചെയ്യണമെന്നാവശ്യപ്പെട്ട് പാക്കിസ്ഥാന് ഹര്‍ജി ഫയല്‍ ചെയ്തിരുന്നു. 2016 ലാണ് ഗ്ലോബ്ബല്‍ യൂണിസെഫ് ഗുഡ്വില്‍ അംബാസഡറായി പ്രിയങ്ക നിയമിതയായത്.
