ന്യൂദല്ഹി: മക്ക മദീന എന്ന ഫേസ്ബുക്ക് പേജില് വന്ന പോസ്റ്റാണ് സുനിത വില്യംസ് എന്ന പേര് ഇപ്പോള് ട്രെന്ഡിങ്ങിന് ഇടയാക്കിയത്. നാസ ബഹിരാകാശ യാത്രികയും ഇന്ത്യന് വംശജയുമായ സുനിത വില്യംസ് ഇസ്ലാമിലേക്ക് മതപരിവര്ത്തനം ചെയ്തു എന്ന് ബംഗാളി ഭാഷയിലുള്ള വീഡിയോ സഹിതം സോഷ്യല് മീഡിയയില് പ്രചരിക്കുകയായിരുന്നു. ഈ വീഡിയോ രണ്ട് ലക്ഷത്തിലേറെ പേര് നിലവില് കണ്ടിട്ടുണ്ട്. 11,000ത്തിലെ വ്യക്തികള് പോസ്റ്റ് ഷെയര് ചെയ്തിട്ടുമുണ്ട്. എന്നാല്, ഈ കള്ളക്കഥയുടെ പിന്നാമ്പുറം തേടി യാഥാര്ഥ്യം വ്യക്തമാക്കിയിരിക്കുന്ന ടൈംസ് ഓഫ് ഇന്ത്യ പത്രം.
ബഹിരാകാശത്ത് വച്ച് ഇടതുവശത്തായി രണ്ട് നക്ഷത്രങ്ങള് കണ്ടെന്നും ബൈനോക്കറിലൂടെ നോക്കുമ്പോള് നക്ഷത്രത്തിലെ വെളിച്ചം മക്കയില് നിന്ന് ഉത്ഭവിക്കുന്നതാണെന്ന് മനസിലായതിനെ തുടര്ന്ന് സുനിത ഇസ്ലാം മതം സ്വീകരിച്ചു എന്നായിരുന്നു പ്രചാരണം. ടൈംസ് ഓഫ് ഇന്ത്യ നടത്തിയ അന്വേഷണത്തില് ഈ വിവരങ്ങള് തെറ്റാണെന്നും സുനിത വില്യംസ് മതം മാറിയിട്ടില്ലെന്നും വ്യക്തമാക്കി. ഇതിനു മുമ്പ് 2010ലും സമാനമായ വ്യാജ പ്രചാരണം ഉണ്ടായിരുന്നു എന്നും റിപ്പോര്ട്ടില് പറയുന്നു.
അച്ഛന് ഹിന്ദുവായത് കൊണ്ട് തന്നെ രാമായണവും അതിലെ കഥാപാത്രങ്ങളെയും മനസ്സിലാക്കിയാണ് താന് വളര്ന്നതെന്നും അമ്മ ക്രൈസ്തവ വിശ്വാസിയായതു കൊണ്ട് തന്നെ ക്രിസ്തുവിനെയും മനസിലാക്കിട്ടുണ്ടെന്നും സുനിത വില്യംസ് പറഞ്ഞു. താന് ദൈവവിശ്വാസിയാണെന്നും അടിസ്ഥാന രഹിതമായ വാര്ത്ത പ്രചരിക്കുന്നതെങ്ങനെയെന്ന് അറിയില്ലെന്നും സുനിത മുമ്പ് മാധ്യമങ്ങളോട് പറഞ്ഞിരുന്നു. തനിക്ക് ഗണേശ ഭഗവാനില് വിശ്വാസമുണ്ട്. സമയം കിട്ടുമ്പോഴൊക്കെ ഭഗവത് ഗീതയും ഉപനിഷത്തുക്കളും വായിക്കുമെന്നും അത് നമ്മുക്ക് ജീവിത മൂല്യങ്ങള് പറഞ്ഞു തരുന്നു എന്നും സുനിത വില്യംസ് വിവിധ മാധ്യമ അഭിമുഖങ്ങളില് വ്യക്തമാക്കിരുന്നു.
