ന്യൂദല്ഹി : ഐഎന്എക്സ് മീഡിയ അഴിമതിക്കേസുമായി ബന്ധപ്പെട്ട് മുന് കേന്ദ്രമന്ത്രിയും കോണ്ഗ്രസ് നേതാവുമായ പി. ചിദംബരത്തിന്റെ മകന് കാര്ത്തി ചിദംബരത്തോട് ദല്ഹിയിലെ വസതി 10 ദിവസത്തിനകം ഒഴിയണമെന്ന് എന്ഫോഴ്സ്മെന്റ് ഡയറക്ടറേറ്റ്. സന്വേഷണവുമായി ബന്ധപ്പെട്ട് കഴിഞ്ഞ വര്ഷം ഈ വസ്തു എന്ഫോഴ്സ്മെന്റ് കണ്ടുകെട്ടിയതാണ്. ഇതിന്റെ തുടര്ച്ചയായാണ് ദല്ഹി ജോര്ബാഗിലെ വസതി ഒഴിഞ്ഞ് വസ്തുവകകളുടെ ഉടമസ്ഥാവകാശം കൈമാറിയിരിക്കണമെന്ന് ആവശ്യപ്പെട്ടിരിക്കുന്നത്.
ദല്ഹി ജോര് ബാഗിലെ 115 എ ബ്ലോക്കിലാണ് കാര്ത്തിയുടെ വസ്തു. കാര്ത്തിയുടെയും അമ്മ നളിനിയുടെയും പേരിലാണ് വസ്തു. കാര്ത്തിയുടെ വസ്തു കൈമാറ്റം ചെയ്യുന്നത് സംബന്ധിച്ച് നിയമപരമായ ഉത്തരവുകള് പുറപ്പെടുവിക്കുമെന്ന് എന്ഫോഴ്സ്മെന്റ് ഡയറക്ടറേറ്റ് കൗണ്സില് നിതേഷ് റാണ അറിയിച്ചു. ഐഎന്എക്സ് മീഡിയ ഇടപാടുമായി ബന്ധപ്പെട്ട് ഇഡിയും സിബിഐയും രജിസ്റ്റര് ചെയ്ത കേസുകള് കോടതികളുടെ പരിഗണനയിലാണ്.
തമിഴ്നാട്ടിലെ ശിവഗംഗയില്നിന്നുള്ള പാര്ലമെന്റ് അംഗമായ കാര്ത്തി നിലവില് കേസില് ജാമ്യത്തിലാണ്. 2007ല് ചിദംബരം കേന്ദ്രധനമന്ത്രിയായിരുന്ന കാലക്ക് ഐഎന്എക്സ് മീഡിയയിലേക്കു മൗറീഷ്യസില്നിന്ന് നിയമ വിരുദ്ധമായി 305 കോടിയുടെ വിദേശനിക്ഷേപം സ്വീകരിക്കാന് സഹായം നല്കിയെന്നതാണ് കാര്ത്തിക്കെതിരായ കേസ്. ഇതിനുള്ള കണ്സള്ട്ടേഷന് ഫീസായി ഐഎന്എക്സില് നിന്ന് 10 ലക്ഷം രൂപ വാങ്ങിയതായും സിബിഐ കണ്ടെത്തിയിട്ടുണ്ട്.
അതേസമയം എയര്സെല് മാക്സിസ് കേസിലും ആരോപിതനായ കാര്ത്തി ചിദംബരത്തെ വെള്ളിയാഴ്ച വരെ അറസ്റ്റ് ചെയ്യുന്നതില് നിന്നും ദല്ഹി കോടതി വിലക്ക് ഏര്പ്പെടുത്തി. കാര്ത്തിയുടെ മുന് കൂര് ജാമ്യാപേക്ഷ പരിഗണിക്കേ പ്രത്യേക ജഡ്ജി ഒ.പി. സെയ്നിയുടേതാണ് ഈ ഉത്തരവ്. എയര്സെല്- മാക്സിസ് കരാറിന് ചട്ട വിരുദ്ധമായി വിദേശത്തു നിന്നും ഫണ്ട് സ്വീകരിച്ചതിന് ഒത്താശ ചെയ്തെന്നതാണ് കാര്ത്തിക്കെതിരായ ആരോപണം.
പി. ചിദംബരം ധനമവന്ത്രിയായിരിക്കേയാണ് കാര്ത്തി ഇത്തരത്തില് വഴിവിട്ട സഹായങ്ങള് നല്കിയിട്ടുള്ളത്. കൂടാതെ ഈ ഇടപാടുകള്ക്ക് ഭീമമായ തുക കണ്സള്ട്ടേഷന് ഫീ എന്ന വകുപ്പില് കൈപ്പറ്റിയിട്ടുണ്ട്. എന്ഫോഴ്സ്മെന്റും സിബിഐയുമാണ് കേസില് അന്വേഷണം നടത്തുന്നത്.
