ന്യൂദല്ഹി: രാജ്യസഭയില് മുത്തലാഖ് ബില്ല് അവതരണം തുടങ്ങി. ബില്ലിനെ അനുകൂലിക്കുമെന്ന് ബിജു ജനതാദള് കേന്ദ്ര സര്ക്കാരിന് ഉറപ്പ് നല്കിയതോടെ മുത്തലാഖ് നിയമമാകുമെന്ന് ഉറപ്പായി. വോട്ടെടുപ്പില് നിന്ന് അണ്ണാ ഡിഎംകെയും വൈഎസ്ആര് കോണ്ഗ്രസും വോട്ടെടുപ്പില് പങ്കെടുക്കില്ലെന്നും വ്യക്തമാക്കിയിട്ടുണ്ട്.
വോട്ടെടുപ്പില് നിര്ബന്ധമായും പങ്കെടുക്കണമെന്ന് കാട്ടി ബിജെപിയും ബിജെഡിയും എംപിമാര്ക്ക് വിപ്പും നല്കി. ബില്ല് പാസ്സാക്കിയെടുക്കുന്നതുമായി ബന്ധപ്പെട്ട് രാവിലെ ബിജെപിയുടെ പാര്ലമെന്ററി പാര്ട്ടി യോഗം അമിത് ഷാ വിളിച്ച് ചേര്ത്തിരുന്നു. മുത്തലാഖ് ബില്ല് ലോക്സഭയില് നേരത്തേ പാസ്സായിരുന്നു. മുത്തലാഖ് ബില്ലിനെതിരായ പ്രതിപക്ഷത്തിന്റെ പ്രമേയം ലോക്സഭ തള്ളി. 303 പേര് ബില്ലിനെതിരായ പ്രതിപക്ഷ പ്രമേയത്തിനെ എതിര്ത്ത് വോട്ട് ചെയ്തു. 82 പേര് അനുകൂലിച്ചു.
മുസ്ലീം സമുദായത്തില് ഭാര്യയുമായി വിവാഹമോചനം നേടാന് ഭര്ത്താവിന് തലാഖ് എന്ന് മൂന്ന് വട്ടം ചൊല്ലിയാല് മതിയെന്ന ചട്ടത്തിനെതിരാണ് ബില്ല്. ഇത്തരത്തില് ഭാര്യയെ മുത്തലാഖ് ചൊല്ലി മൊഴി ചൊല്ലുന്ന ഭര്ത്താക്കന്മാര്ക്ക് ജയില് ശിക്ഷ നല്കാനുള്ള ചട്ടങ്ങള് ബില്ലിലുണ്ട്. മുസ്ലീം സ്ത്രീകള്ക്ക് നീതി ഉറപ്പാക്കാനുള്ള ബില്ലിനെതിരെ പ്രതിപക്ഷം രാജ്യസഭയില് പ്രതിഷേധം തുടരുകയാണ്. എന്നാല് ബില്ല് അവതരണം നിര്ത്തിവെക്കില്ലെന്ന് കര്ശന നിലപാടാണ് കേന്ദ്ര സര്ക്കാര് സ്വീകരിച്ചിരിക്കുന്നത്.
