ബെംഗളൂരു: കഴിഞ്ഞ തിങ്കളാഴ്ച ഐഎസ്ആര്ഒ വിജയകരമായി വിക്ഷേപിച്ച ചാന്ദ്ര ദൗത്യം ചന്ദ്രയാന്-രണ്ടിലെ ഓര്ബിറ്റര് രണ്ട് വര്ഷം ചന്ദ്രനെ വലവയ്ക്കുമെന്ന് ഔദ്യോഗിക വൃത്തങ്ങള്. വിക്ഷേപണ സമയത്ത് ഓര്ബിറ്ററിന്റെ കാലാവധി ഒരു വര്ഷമെന്നായിരുന്നു ഐഎസ്ആര്ഒ പറഞ്ഞത്.
ഓര്ബിറ്ററിന്റെ ഇന്ധനത്തിന്റെ ലഭ്യതയും കാലാവസ്ഥയടക്കം മറ്റു സാഹചര്യങ്ങളും വിലയിരുത്തിയാണ് ഐഎസ്ആര്ഒയുടെ പുതിയ കണക്കുകൂട്ടല്. വിക്ഷേപണ സമയത്ത് 1,697 കിലോ ഇന്ധനമായിരുന്നു ഓര്ബിറ്ററിലുണ്ടായിരുന്നത്. ആദ്യത്തെ രണ്ട് ഭ്രമണപഥത്തിലെത്താനായി 130 കിലോ ഇന്ധനം ഉപയോഗിച്ചു. ഇനി 1500 കിലോ ഇന്ധനം ഓര്ബിറ്ററിലുണ്ട്. ഭൂമിയുടെ ഭ്രമണപഥത്തില് തുടര്ന്ന് സഞ്ചരിക്കാന് 657.3 കിലോ ഇന്ധമാകും ആവശ്യം. ചന്ദ്രന് ചുറ്റും ഭ്രമണം ചെയ്യാന് ഏതാണ്ട് 749.5 കിലോ ഇന്ധനം വേണം. ഇതിനു ശേഷം ഒര്ബിറ്ററില് 290.2 കിലോ ഇന്ധനം ബാക്കിയുണ്ടായിരിക്കും. ഈ ഇന്ധന ലഭ്യതയാണ് ഓര്ബിറ്ററിന്റെ കാലാവധി നിര്ണയിക്കുക.
വിക്ഷേപണ സമയത്ത് കണക്കുകൂട്ടിയതിനേക്കാള് അധിക ഇന്ധനം ഓര്ബിറ്ററിന് ഇപ്പോള് ലഭ്യമാണ്. ഒരു വര്ഷത്തേക്ക് ആവശ്യമായതിനേക്കാള് കൂടുതല്. ഇതുവരെ 40 കിലോ ഇന്ധനം ലാഭിക്കാന് കഴിഞ്ഞെന്നും ശാസ്ത്രജ്ഞര് പറഞ്ഞു. അവശേഷിക്കുന്ന ഇന്ധനം രണ്ട് വര്ഷത്തേക്ക് അധികമെന്നാണ് ഇപ്പോഴത്തെ വിലയിരുത്തല്. ആഗസ്റ്റ് 20ന് ചന്ദ്രയാന്-രണ്ട് ചന്ദ്രന്റെ ഭ്രമണപഥത്തിലെത്തുമെന്നാണ് ഐഎസ്ആര്ഒ അറിയിച്ചത്. അപ്പോള് മാത്രമേ എത്രത്തോളം ഇന്ധനം ബാക്കിയുണ്ടെന്ന് കൃത്യമായി അറിയാനാകൂയെന്നും ഐഎസ്ആര്ഒ വൃത്തങ്ങള് കൂട്ടിച്ചേര്ത്തു.
