ലണ്ടന്‍: ക്രിക്കറ്റിലെ കുഞ്ഞന്മാരായ അയര്‍ലന്‍ഡിനോട് ഏക ടെസ്റ്റിന്റെ ആദ്യ ഇന്നിങ്ങ്‌സില്‍ നാണംകെട്ട ഇംഗ്ലണ്ട് നൈറ്റ്് വാച്ച്മാന്‍ ജാക്ക് ലീച്ചിന്റെയും ഓപ്പണര്‍ ജേസണ്‍ റോയിയുടെയും അര്‍ധ സെഞ്ചുറികളില്‍ കരകയറുന്നു.
ആദ്യ ഇന്നിങ്ങ്‌സിലെ 122 റണ്‍സ് കടവുമായി രണ്ടാം ദിനത്തില്‍ രണ്ടാം ഇന്നിങ്ങ്‌സ് പുനരാരംഭിച്ച ഇംഗ്ലണ്ട് ചായ സമയത്ത് കളിനിര്‍ത്തുമ്പോള്‍ അഞ്ചു വിക്കറ്റിന് 209 റണ്‍സ് എടുത്തു. ഇംഗ്ലണ്ടിന് ഇതോടെ 87 റണ്‍സ് ലീഡായി. അഞ്ചു വിക്കറ്റും കൈവശമുണ്ട്്. ജാക്ക് ലീച്ച് 92 റണ്‍സും ജേസണ്‍ റോയി 72 റണ്‍സും നേടി. ബെയര്‍സ്‌റ്റോ പൂജ്യത്തിന് പുറത്തായി.
ആദ്യ ദിനത്തില്‍ 85 റണ്‍സിന് ഓള്‍ ഔട്ടായി ഇംഗ്ലണ്ട് , മറുപടി ബാറ്റിങ്ങിനിറങ്ങിയ അയര്‍ലന്‍ഡിനെ 207 റണ്‍സിലൊതുക്കി നിര്‍ത്തി. ഇതോടെ അയര്‍ലന്‍ഡിന് 122 റണ്‍സ് ലീഡ് ലഭിച്ചു. ആദ്യം ദിനം കളിനിര്‍ത്തുമ്പോള്‍ രണ്ടാം ഇന്നിങ്ങ്‌സിലെ ഒരു ഓവര്‍ നേരിട്ട ഇംഗ്ലണ്ടിന് സ്‌കോര്‍ ബോര്‍ഡ് തുറക്കാനായില്ല. ഓപ്പണര്‍ ബേണ്‍സും നൈറ്റവാച്ച്മാനായി ഇറങ്ങിയ ജാക്ക് ലീച്ചും പുറത്താകാതെ നിന്നു.
ഇന്നലെ രണ്ടാം ഇന്നിങ്ങ്‌സ് പുനരാരംഭിച്ച ഇംഗ്ലണ്ടിന് ബേണ്‍സിനെ തുടക്കത്തിലെ നഷ്ടമായി. ആറു റണ്‍സ് കുറിച്ച ബേണ്‍സിനെ റങ്കിന്‍ വീഴ്‌ത്തി. ആദ്യ വിക്കറ്റ് വീഴുമ്പോള്‍ ഇംഗ്ലണ്ട് സ്‌കോര്‍ ബോര്‍ഡില്‍ 26 റണ്‍സ് മാത്രം. ബേണ്‍സിന് പിന്നാലെ എത്തിയ ജേസണ്‍ റോയ് ഓപ്പണര്‍ ലീച്ചിനൊപ്പം പൊരുതി നിന്നതോടെ ഇംഗ്ലണ്ട് കരകയറി.
രണ്ടാം വിക്കറ്റില്‍ ഇവര്‍ 145 റണ്‍സിന്റെ കൂട്ടുകെട്ടുണ്ടാക്കി. ഏകദിനം പോലെ അടിച്ചുതകര്‍ത്ത ജേസണ്‍ റോയ് 78 പന്തില്‍ 72 റണ്‍സ് നേടി. ജേസണ്‍ റോയിക്ക് പിന്നാലെ ജാക്ക് ലീച്ചും പുറത്തായി. 162 പന്തില്‍ പതിനാറ് ഫോറുകളുടെ പിന്‍ബലത്തിലാണ് ലീച്ച് 92 റണ്‍സ് നേടിയത്.
പേസര്‍മാരായ സ്റ്റുവര്‍ട്ട് ബ്രോഡ്, ഒ.പി. സ്‌റ്റോണ്‍, സാം കറന്‍ എന്നിവരുടെ മികവുറ്റ ബൗളിങ്ങിലാണ് ഇംഗ്ലണ്ട് ഒന്നാം ഇന്നിങ്ങ്‌സില്‍ അയര്‍ലന്‍ഡിനെ 207 റണ്‍സിലൊതുക്കിയത്. ഇവര്‍ മൂന്ന് പേരും മൂന്ന് വിക്കറ്റ്് വീതം വീഴ്‌ത്തി.
അയര്‍ലന്‍ഡിന്റെ ആന്‍ഡി ബാല്‍ബിര്‍നി അര്‍ധ സെഞ്ചുറി നേടി. 69 പന്തില്‍ പത്ത് ഫോറുകളുടെ പിന്‍ബലത്തില്‍ 55 റണ്‍സ് കുറിച്ചു. പോള്‍ സ്റ്റര്‍ലിങ് 36 റണ്‍്‌സ് എടുത്തു. 43 പന്തില്‍ നാല് ബൗണ്ടറിയടിച്ചു. കെവിന്‍ ഓബ്രീന്‍ 28 റണ്‍സുമായി പുറത്താകാതെ നിന്നു. അയര്‍ലന്‍ഡിന്റെ മറ്റ് ബാറ്റ്‌സ്മാന്മാര്‍ക്കൊന്നും ഇംഗ്ലീഷ് ബൗളിങ്ങിന് മുന്നില്‍ പിടിച്ചുനില്‍ക്കാനായില്ല.
