കൊളംബോ: ബംഗ്ലാദേശ്- ശ്രീലങ്ക ആദ്യ ഏകദിന മത്സരം ഇന്ന് പ്രേമദാസ സ്റ്റേഡിയത്തില് നടക്കും. ദിന രാത്രി മത്സരമാണ്. പരമ്പരയില് മൂന്ന് മത്സരങ്ങളാണുള്ളത്.
പരിചയ സമ്പന്നനായ ശ്രീലങ്കന് ഫാസ്റ്റ്് ബൗളര് ലസിത് മലിംഗ ഈ മത്സരത്തോടെ ഏകദിന ക്രിക്കറ്റില് നിന്ന് വിരമിക്കും. അടുത്ത രണ്ട് മത്സരങ്ങള്ക്കുള്ള ടീമില് മലിംഗയ്ക്ക് പകരം ദുശാന് ഷാനകയെ ഉള്പ്പെടുത്തിയതായി ശ്രീലങ്കന് ക്രിക്കറ്റ് ബോര്ഡ് അറിയിച്ചു.
രണ്ടാം ഏകദിനം 28 നും അവസാന മത്സരം 31 നും അരങ്ങേറും. എല്ലാ മത്സരങ്ങളും പ്രേമദാസ സ്റ്റേഡിയത്തിലാണ് അരങ്ങേറുക.
സന്തോഷത്തോടെയാണ് യുവതാരങ്ങള്ക്കായി വഴിമാറിക്കൊടുക്കുന്നതെന്ന് മലിംഗ പറഞ്ഞു. തിരിച്ചടികള് ഉണ്ടായിട്ടുണ്ട്. എന്നിരുന്നാലും ഒരു ലോകകപ്പ് കൂടി നേടാനുള്ള കഴിവ് നമുക്കുണ്ടെന്ന് മലിംഗ കൂട്ടിച്ചേര്ത്തു. ടീമിന്റെ പരിശീലനത്തിനിടയില് സംസാരിക്കുകയായിരുന്നു മലിംഗ.
ഏകദിനത്തില് നിന്ന് വിരമിച്ചാലും മലിംഗ ടി ട്വന്റി മത്സരങ്ങള് കളിക്കും. ഓസ്ട്രേലിയയില് അടുത്ത വര്ഷം നടക്കുന്ന ടി ട്വന്റി ലോകകപ്പ് വരെ ടീമില് തുടരും.
