ബെയ്ജിങ്: ടിയാനന്മെന് കൂട്ടക്കൊലയിലെ പങ്കിനെ തുടര്ന്ന് ‘ബെയ്ജിങ്ങിലെ കശാപ്പുകാരന്’ എന്നറിയപ്പെട്ടിരുന്ന മുന് ചൈനീസ് പ്രധാനമന്ത്രി ലി പെങ് (90) അന്തരിച്ചു.നാഷണല് പീപ്പിള്സ് കോണ്ഗ്രസ് സ്റ്റാന്ഡിങ് കമ്മിറ്റിയുടെ മുന് ചെയര്മാന്റെ മരണം ഔദ്യോഗികമാധ്യമം ഷിന്ഹുവയാണ് പുറത്തുവിട്ടത്. നേരത്തേ മൂത്രാശയ അര്ബുദത്തിന് ഇയാള് ചികിത്സതേടിയിരുന്നു.
ടിയാനന്മെനില് ജനാധിപത്യപ്രക്ഷോഭകര്ക്കുനേരെ നടപടിക്ക് ഉത്തരവിട്ടതിലൂടെയാണ് ലി ലോകം മുഴുവന് കുപ്രസിദ്ധനായത്. ദശാബ്ദത്തോളം ചൈനയിലെ കമ്യൂണിസ്റ്റ് ഭരണത്തിന്റെ നേതാവായിരുന്നു ഇയാള്. 1989 മേയില് വിദ്യാര്ഥികളും ജോലിക്കാരുമടക്കം 10 ലക്ഷത്തിലേറേ പേര് ബെയ്ജിങ്ങിലെ ടിയാനന്മെന് ചത്വരത്തില് പ്രതിഷേധവുമായെത്തി. ജനാധിപത്യാവകാശങ്ങളും കമ്യൂണിസ്റ്റ് പാര്ട്ടി നേതാക്കളുടെ രാജിയുമായിരുന്നു അവര് ആവശ്യപ്പെട്ടത്. ദിവസങ്ങള് നീണ്ട പ്രക്ഷോഭം നേരിടാന് സര്ക്കാര് പട്ടാളത്തെ ഇറക്കി.
ജൂണ് നാലിന് പുലര്ച്ചെ 50 സൈനിക ട്രക്കുകളും 10,000 പട്ടാളക്കാരും ഇവരെ നേരിട്ടു. പ്രക്ഷോഭകാരികളെ സൈനികവാഹനങ്ങള് ഇടിച്ചുവീഴ്ത്തി ചതച്ചരയ്ക്കുകയും വെടിവെച്ചു കൊല്ലുകയും ചെയ്തു. സംഭവത്തില് ആയിരത്തിലധികം പേര് മരിച്ചതായാണ് പുറത്തുവന്ന റിപ്പോര്ട്ടുകള്. എന്നാല് കൃത്യമായ കണക്ക് ഇതുവരെ ചൈന പുറത്തുവിട്ടിട്ടില്ല.
