1964ലെ കമ്മ്യൂണിസ്റ്റ് പാര്ട്ടിയുടെ പിളര്പ്പിനുശേഷം നിലവില്വന്ന സിപിഐയെക്കുറിച്ച് പൊതുജനത്തിന് പൊതുവെ മതിപ്പായിരുന്നു. കാരണം നിസ്വാര്ത്ഥരും മനുഷ്യസ്നേഹികളുമായ ഒരുകൂട്ടം നേതാക്കള് അതിലുണ്ടായിരുന്നു. കാലം നീങ്ങുന്തോറും നല്ല നേതാക്കള് മണ്മറയുന്നതോടൊപ്പം പാര്ട്ടിയിലും അപചയം സംഭവിക്കാന് തുടങ്ങി. നമ്മുടെ സംസ്ഥാനം ഭരിക്കുന്ന ഇടതുപക്ഷ ജനാധിപത്യ മുന്നണിയിലെ വല്യേട്ടനായ സിപിഎമ്മിന്റെ താഴെയുള്ള സഹോദരനാണ് സിപിഐ. മറ്റു ഘടകകക്ഷികളെല്ലാം ഔദാര്യത്തിന്റെ പേരില് തങ്ങള്ക്കുലഭിച്ച അപ്പക്കഷ്ണം കടിച്ചുകൊണ്ട് അലട്ടില്ലാതെ, ആരേയും അലോസരപ്പെടുത്താതെ കഴിയുകയാണ്.
ഭരണത്തിന്റെ ലഹരിയില് സിപിഎമ്മിന്റെ ധാര്ഷ്ട്യവും വഴിവിട്ടപോക്കും തടയുവാന് ഒരു പ്രമുഖ ഘടകകക്ഷിയായ സിപിഐക്ക് കഴിയേണ്ടതായിരുന്നു. എന്നാല് ആ പാര്ട്ടി സിപിഎമ്മിന്റെ ബ്ലാക്ക് മെയിലിങ്ങില് കുടുങ്ങി കിടക്കുകയാണെന്ന് പറയപ്പെടുന്നു. തന്മൂലം സുവിശേഷം പ്രസംഗിക്കാനല്ലാതെ മറ്റൊന്നിനും അവര്ക്ക് കഴിയുന്നില്ല. മറിച്ച്, ഒരു ഘടക കക്ഷിയുടെ ഉത്തരവാദിത്വത്തോടെ ആ പാര്ട്ടി പ്രവര്ത്തിച്ചിരുന്നെങ്കില് ശബരിമല വിഷയംപോലും ഇത്രമേല് വഷളാകുമായിരുന്നില്ല; കഴിഞ്ഞ ലോകസഭാ തെരഞ്ഞെടുപ്പില് ഇരു പാര്ട്ടികള്ക്കും ഈ ദുര്യോഗം ഉണ്ടാവുകയുമില്ല. എന്നാല് ഈ ദൗര്ബ്ബല്യം ഒരിക്കലും സിപിഐസമ്മതിച്ചുതരില്ല. പോലീസ് കമ്മീഷണര്മാര്ക്ക് മജിസ്റ്റീരിയല് അധികാരം നല്കാനുണ്ടായ നീക്കം പരാജയപ്പെടുത്തിയത് തങ്ങളാണെന്ന് അവര് പറയും.
താന് കൂവിയിട്ടാണ് നേരം വെളുത്തതെന്ന് പൂവന്കോഴി പറയുന്നതായിട്ടെ സിപിഎംകാര് തന്നെ ഇതിനെ കണക്കാക്കു. ഏറ്റവും ഒടുവില് യൂണിവേഴ്സിറ്റി കോളേജിലെ സംഭവം നടന്നപ്പോള് സിപിഐയുടെ സംസ്ഥാന സെക്രട്ടറി പറഞ്ഞതെന്താണ്? തങ്ങളുടെ പാര്ട്ടി സംഘടനക്കുപോലും അവിടെ സ്വാതന്ത്ര്യമില്ല; നോമിനേഷന് കൊടുക്കാന്പോലും കഴിയില്ല എന്നൊക്കെയല്ലേ! ഇതുകേട്ട് ജനം മൂക്കത്തു വിരല്വെച്ചു പോയി, സഖാവേ! നിങ്ങളുടെ ഗതികേടോര്ത്ത് ലജ്ജിച്ചു തലതാഴ്ത്തി.
ഈ വിഷയത്തില് ഭരണകക്ഷിയായ നിങ്ങളെ കുറ്റം പറയുവാന് പ്രതിപക്ഷത്തിനും അര്ഹതയില്ല. മൂന്നുകൊല്ലം മുമ്പ് നാടുഭരിച്ചിരുന്നത് അവരാണല്ലോ. ഇന്നത്തെ പ്രതിപക്ഷ നേതാവ് അന്ന് ആഭ്യന്തര മന്ത്രിയുമായിരുന്നല്ലോ. അന്നും യൂണിവേഴ്സിറ്റി കോളേജ് ഭരണം എസ്എഫ്ഐക്കായിരുന്നില്ലേ. അവരെ നിലയ്ക്കുനിര്ത്താനോ റബ്ബര് സ്റ്റാമ്പായ പ്രിന്സിപ്പാളെ മാറ്റി പ്രതിഷ്ഠിക്കാനോ അദ്ധ്യാപക സഖാക്കളെ കൂട്ടത്തോടെ തുരത്താനോ എന്തുകൊണ്ട് ശ്രമിച്ചില്ല? നുള്ളിയെടുക്കേണ്ടത് നുള്ളിയെടുക്കണം. തോണ്ടിയെടുക്കേണ്ടത് തോണ്ടിയെടുക്കണം. അടിച്ചമര്ത്തേണ്ടത് അടിച്ചമര്ത്തുക തന്നെവേണം.
ടി. സംഗമേശന്, താഴെക്കാട്
