തിരുവനന്തപുരം: മോഷണം പോയ ഉത്തരക്കടലാസുകള് തങ്ങളുടേതു തന്നെയെന്ന് സര്വകലാശാല. പരീക്ഷാപേപ്പര് പുറത്ത് പോയെന്നും യൂണിവേഴ്സിറ്റി കോളേജിലെ വധശ്രമക്കേസില് പ്രതിയായ ശിവരഞ്ജിത്തിന്റെ വീട്ടില് നിന്നും കണ്ടെത്തിയ ഉത്തരക്കടലാസുകള് സര്വകലാശാലയുടേതാണെന്നും സിന്ഡിക്കേറ്റിന് പരീക്ഷാകണ്ട്രോളര് റിപ്പോര്ട്ട് നല്കി. സംഭവത്തെക്കുറിച്ച് അന്വേഷിച്ച് റിപ്പോര്ട്ട് സമര്പ്പിക്കാന് ഇന്നലെ ചേര്ന്ന സിന്ഡിക്കേറ്റ് യോഗം ഉപസമിതിക്ക് നിര്ദേശം നല്കി. പ്രൊഫ.കെ.ജി ഗോപ്ചന്ദ്രന്, ഡോ.കെ.ബി മനോജ്, ഡോ.കെ ലളിത എന്നിവരാണ് ഉപസമിതിയില്.
സര്വകലാശാല ഓരോ കോളേജിനും ഉത്തരക്കടലാസുകള് അനുവദിക്കുന്നത് ക്രമ നമ്പര് അനുസരിച്ചാണ്. 2015 നവംബര് അഞ്ചിനും 2016 ഏപ്രില് ഒന്നിനും യൂണിവേഴ്സിറ്റി കോളേജ് കൈപ്പറ്റിയ ഉത്തരക്കടലാസുകളില് ചിലതാണ് പുറത്ത് പോയിരിക്കുന്നത്. ഇത് ഗുരുതരമായ കൃത്യവിലോപമാണെന്ന് യോഗം വിലയിരുത്തി.
കേരള സര്വകലാശാലയുടെ പരീക്ഷാ സംവിധാനങ്ങളാകെ കുറ്റമറ്റതും നീതിയുക്തവുമാക്കുന്നതിന് പര്യാപ്തമാകുന്ന തരത്തില് വിജിലന്സ് സെല് രൂപീകരിക്കുന്നതിനും തീരുമാനിച്ചു. അതിന് എസ്പി റാങ്കില് കുറയാത്ത ഒരു പോലീസ് ഉദ്യോഗസ്ഥന്റെ സേവനം ഉള്പ്പെടെ അനുവദിക്കുന്നതിന് സര്ക്കാരിനോട് ആവശ്യപ്പെടും.
സര്വകലാശാലയുടെ എല്ലാ പരീക്ഷാസെന്ററുകളും കാര്യക്ഷമമായി പ്രവര്ത്തിക്കുന്നുവെന്ന് ഉറപ്പുവരുത്താന് ഇന്സ്പെക്ഷന് വിങ് രൂപീകരിക്കും.
