ന്യൂദല്ഹി : എംപിമാരെയെല്ലാം ഒരുമിച്ചു നിര്ത്തി മോദി സര്ക്കാരിനെ പ്രതിരോധിക്കാന് തീരുമാനിച്ചെങ്കിലും ഇതൊന്നും മുഖവിലയ്ക്ക് എടുക്കാതെ കോണ്ഗ്രസ് എംപിമാര്. കഴിഞ്ഞ ദിവസം ലോക്സഭയില് അവതരിപ്പിച്ച എന്ഐഎ ഭേദഗതി ബില്ലിനെ പിന്തുണച്ച് വോട്ട് ചെയ്യണമെന്ന നിര്ദ്ദേശത്തെയാണ് കോണ്ഗ്രസ് എംപിമാര് അവഗണിച്ചത്.
ബില്ല് വോട്ടെടുപ്പിന് ഇടുന്നതിനു തൊട്ടുമുമ്പ് കേരളത്തില് നിന്നുള്ള കെ. മുരളീധരനും ആന്റോ ആന്റണിയും പുറത്തുപോയി. ഇവര് സമയത്ത് പങ്കെടുക്കാനെത്തിയതുമില്ല. ഇതോടെ എംപിമാര്ക്ക് സഭാ നടപടികളെക്കുറിച്ച് മാര്ഗ്ഗ നിര്ദ്ദേശം നല്കിയിരുന്ന മുതിര്ന്ന കോണ്ഗ്രസ് നേതാവ് അധീര് രഞ്ജന് ചൗധരിയുടെ പിടിപ്പുകേടാണ് ഇതിനു കാരണമെന്നും അംഗങ്ങള്ക്കിടയില് ആരോപണം ഉയര്ന്നിട്ടുണ്ട്.
സഭയില് പാര്ട്ടി എംപിമാര് ഒറ്റക്കെട്ടായി നില്ക്കണമെന്ന് സോണിയ ഗാന്ധി മുന്പ് ആവശ്യപ്പെട്ടിരുന്നു. ഓരോ ദിവസത്തെയും നിലപാട് തീരുമാനിക്കാന് രാവിലെ സഭ ചേരുന്നതിനു മുന്പ് എംപിമാര് യോഗം ചേരണമെന്നും നിര്ദ്ദേശിച്ചിരുന്നു. ഈ ക്ലാസ്സുകളിലെല്ലാം പങ്കെടുത്ത കെ. മുരളീധരനും, ആന്റോ ആന്റണിയും തന്നെ നിര്ദ്ദേശങ്ങള് അവഗണിക്കുന്ന വിധത്തിലുള്ള നടപടിയാണ് സ്വീകരിച്ചത്.
അതേസമയം സര്ക്കാര് അവതരിപ്പിച്ച ബില്ലിലെ പോരായ്മകള് പരിഹരിക്കേണ്ടതു പ്രതിപക്ഷത്തിന്റെ കടമയാണെന്നും ഭരണകൂടത്തെ കണ്ണടച്ചു പിന്തുണയ്ക്കുന്നത് ശരിയല്ലെന്നും ചൂണ്ടിക്കാട്ടിയാണു സഭ വിട്ടതെന്നു മുരളീധരന് വ്യക്തമാക്കി.
എന്നാല് പാര്ട്ടി നിലപാടിനു വിരുദ്ധമായി സഭ ബഹിഷ്കരിച്ചതല്ലെന്നും മുന്കൂട്ടി നിശ്ചയിച്ച ചില ഔദ്യോഗിക പരിപാടികള് മൂലം പുറത്തുപോയതാണെന്നും ആന്റോ പ്രതികരിച്ചു.
