തിരുവനന്തപുരം: യൂണിവേഴ്സിറ്റി കോളേജില് മൂന്നാം വര്ഷ ബിരുദ വിദ്യാര്ഥി അഖിലിനെ കുത്തിയ സംഭവത്തിനു പിന്നാലെ കോളേജില് നടന്ന ക്രമക്കേടുകളുടെ കൂടുതല് വിവരങ്ങള് പുറത്ത്. യൂണിവേഴ്സിറ്റി കോളേജില് നടക്കുന്നത് അടിമുടി ക്രമക്കേടാണെന്ന് വൈസ് ചാന്സലര് ഡോ. വി.പി. മഹാദേവന് പിള്ള. കത്തിക്കുത്ത് കേസിലെ പ്രധാനപ്രതി എസ്എഫ്ഐ യൂണിറ്റ് പ്രസിഡന്റ് ശിവ രഞ്ജിത്തിന്റെ വീട്ടില് നിന്നു സര്വകലാശാലയുടെ ഉത്തരക്കടലാസുകള് കണ്ടെടുത്ത സംഭവത്തില് കോളേജ് അധികൃതര്ക്ക് വന് വീഴ്ച സംഭവിച്ചില്ലെന്നു വിസി. ഇതിന്റെ അടിസ്ഥാനത്തില് കോളേജില് നടന്ന പരീക്ഷകളില് വിശദമായ അന്വേഷണം നടത്തുമെന്നും അദ്ദേഹം പറഞ്ഞു. അതേസമയം, സര്വകലാശാലയയില് നിന്ന് സീലുകള് ഒന്നും മോഷണം പോയിട്ടില്ലെന്നും അവ ശിവ രഞ്ജിത്ത് വ്യജമായി നിര്മിച്ചതാകാമെന്നുമാണു അധികൃതരുടെ ന്യായീകരണം.
ശിവരഞ്ജിത്തിന്റെ വീട്ടില് നിന്നും ഇന്നലെയാണു കേരള സര്വ്വകലാശാലയുടെ ഉത്തരക്കടലാസുകള് പിടിച്ചെടുത്തത്. ഇയാളുടെ വീട്ടില് പൊലീസ് നടത്തിയ പരിശോധനയിലാണ് സര്വ്വകലാശാല പരീക്ഷക്ക് ഉത്തരം എഴുതാനുള്ള പേപ്പറുകള് കണ്ടെത്തിയത്. ഒപ്പം, ഫിസിക്കല് എഡ്യുക്കേഷന്സ ഡയറക്റ്ററുടെ സീലും പിടിച്ചെടുത്തിരുന്നു.എന്തിന് വേണ്ടിയാണ് ശിവരഞ്ജിത്ത് പേപ്പറുകള് സൂക്ഷിച്ചു വച്ചതെന്നും എവിടെ നിന്നാണ് ഇത് കിട്ടിയതെന്നും വ്യക്തമല്ലന്ന് പോലീസ് പറഞ്ഞു.കോപ്പിയടിക്ക് വേണ്ടിയാവാം ഉത്തരക്കടലാസുകള് ഉപയോഗിച്ചതെന്നാണു പൊലീസ് സംശയിക്കുന്നത്. കേസ് അന്വേഷിക്കുന്ന കന്റോണ്മെന്റ് എസ്ഐയുടെ നേതൃത്വത്തിലാണ് ശിവരഞ്ജിത്തിന്റെ വീട്ടില് വൈകിട്ട് റെയ്ഡ് നടത്തിയത്. റെയ്ഡിനിടെ ശിവരഞ്ജിത്തിന്റെ ബന്ധുക്കള് റിപ്പോര്ട്ട് ചെയ്യാനെത്തിയ മാധ്യമപ്രവര്ത്തകരെ കൈയ്യേറ്റം ചെയ്യാനും ശ്രമിച്ചു.
