ലോര്ഡ്സ്: ലോകകപ്പ് ഫൈനലില് കളിക്കാനിറങ്ങിയ ന്യൂസിലന്ഡ് നായകന് കെയ്ന് വില്യംസണിന് ഒരു റെക്കോഡ് സ്വന്തം. മത്സരത്തില് ഒരു റണ്ണെടുത്തതോടെയാണ് റെക്കോഡ് കരസ്ഥമാക്കിയത്. ഒരു ലോകകപ്പില് ഏറ്റവും കൂടുതല് റണ്സെടുത്ത നായകനെന്ന പദവിയാണ് വില്യംസണെ തേടിയെത്തിയത്.
ഇതോടെ 12 വര്ഷം മുമ്പ് ശ്രീലങ്കന് ക്യാപ്റ്റന് മഹേല ജയവര്ധന നേടിയ റെക്കോഡ് പഴങ്കഥയായി. 2007 ലോകകപ്പില് 548 റണ്സാണ് ജയവര്ധന അടിച്ചെടുത്തത്. ഇംഗ്ലണ്ടിനെതിരേ കലാശപ്പോരില് കളിക്കാനിറങ്ങുമ്പോള് വില്ല്യംസണിന്റെ പേരില് 548 റണ്സുണ്ടായിരുന്നു. ഇംഗ്ലണ്ടിനെതിരേ 30 റണ്സ് നേടിയതോടെ കിവീസ് ക്യാപ്റ്റന് ഈ ലോകകപ്പില് 10 മത്സരങ്ങളില് നിന്ന് 578 റണ്സ് നേടി.
എന്നാല് ഫൈനലില് വില്യംസണ് തിളങ്ങാനായില്ല. 53 പന്തില് 30 റണ്സെടുത്ത താരത്തെ പ്ലങ്കറ്റ് വിക്കറ്റ് കീപ്പര് ബട്ലറുടെ കൈകളിലെത്തിച്ചു. ഈ ലോകകപ്പിലെ റണ്വേട്ടയില് രോഹിത് ശര്മ, ഡേവിഡ് വാര്ണര്, ഷാക്കിബ് അല് ഹസന് എന്നിവര്ക്ക് പിന്നില് നാലാമതാണ് വില്യംസണ്. പത്ത് ഇന്നിങ്സില് നിന്ന് 578 റണ്സാണ് കിവീസ് നായകന്റെ സമ്പാദ്യം.
2007 ലോകകപ്പില് 539 റണ്സ് നേടിയ ഓസീസ് ക്യാപ്റ്റനായിരുന്ന റിക്കി പോണ്ടിങ് ആണ് ഈ റെക്കോഡില് മൂന്നാമത്. ഈ ലോകകപ്പില് 507 റണ്സടിച്ച ഓസീസ് ക്യാപ്റ്റന് ആരോണ് ഫിഞ്ച് നാലാമതും 2015 ലോകകപ്പില് 482 റണ്സ് അടിച്ച ദക്ഷിണാഫ്രിക്കന് താരം എ.ബി. ഡിവില്ലിയേഴ്സ് അഞ്ചാം സ്ഥാനത്തുമുണ്ട്.
