ആലപ്പുഴ : സിപിഎം നേതാവായ മാരാരിക്കുള്ളം വടക്ക് പഞ്ചായത്ത് പ്രസിഡന്റിനെതിരെ നിരന്തരമായി ഉണ്ടാകുന്ന ആരോപണങ്ങള് അന്വേഷിക്കാന് പാര്ട്ടി രണ്ടംഗ കമ്മീഷനെ നിയോഗിച്ചു. പഞ്ചായത്ത് അംഗത്തിന്റെ ഭര്ത്താവ് നല്കിയ പരാതിയിലാണ് പുതിയ നടപടി. വര്ഷങ്ങള്ക്കു മുന്പും പ്രസിഡന്റിനെതിരെ ആരോപണങ്ങള് ഉയര്ന്നിരുന്നു. അന്ന് മാധ്യമങ്ങളില് വാര്ത്ത വന്നത് പാര്ട്ടിക്ക് നാണക്കേട് ഉണ്ടാക്കിയിരുന്നു.
പലതവണ താക്കീത് നല്കിയിട്ടും പ്രസിഡന്റ് ആരോപണങ്ങളില്പ്പെടുന്നത് പാര്ട്ടി നേതൃത്വത്തിനും തലവേദനയായി. പാര്ട്ടിയിലെ ഒരു വിഭാഗം ഇതിനെതിരെ രംഗത്തുവന്നിട്ടുണ്ട്. പഞ്ചായത്ത് പ്രസിഡന്റ് സ്ഥാനത്തിരിക്കുന്ന ജനപ്രതിനിധിയുടെ പ്രവൃത്തികള് പാര്ട്ടിക്ക് മാനക്കേട് ഉണ്ടാക്കുന്നതായി കാട്ടി ഇവര് ജില്ലാ നേതൃത്വത്തിന് ഉള്പ്പെടെ പരാതി നല്കാന് ഒരുങ്ങുന്നതായാണ് വിവരം. എന്നാല് പാര്ട്ടിയിലെ വിഭാഗീയ പ്രവര്ത്തനങ്ങളുടെ ഭാഗമായാണ് പ്രസിഡന്റിനെതിരെ ആരോപണങ്ങള് ഉണ്ടാകുന്നതെന്നാണ് ഇയാളെ അനുകൂലിക്കുന്നവരുടെ മറുവാദം.
ഇതിനിടെ വടക്ക് പഞ്ചായത്തിലെ അഴിമതിയും ധൂര്ത്തും കെടുകാര്യസ്ഥതയും പ്രസിഡന്റിന്റെ പേരില് തുടര്ച്ചയായി ഉണ്ടാകുന്ന ആരോപണങ്ങളുടെയും വെളിച്ചത്തില് പഞ്ചായത്ത് ഓഫീസും പരിസരവും പഞ്ചായത്ത് അംഗങ്ങള് ചാണകം തളിച്ച് ശുദ്ധീകരിച്ചു. കോണ്ഗ്രസ് അംഗങ്ങളുടെ നേതൃത്വത്തിലായിരുന്നു പ്രതിഷേധം.
പഞ്ചായത്തിലെ സ്ത്രീ സുരക്ഷ അവതാളത്തിലായതായി അവര് കുറ്റപ്പെടുത്തി. കേരഗ്രാമം, കയര് ഗ്രാമം, വഴുതനോത്സവം, ബീച്ച് ഫെസ്റ്റിവെല് ഇവയൊക്കെ നടത്തിയതിന്റെ അഴിമതികള് വിജിലന്സ് അന്വേഷിക്കണമെന്നും അംഗങ്ങള് ആവശ്യപ്പെട്ടു. പ്രസിഡന്റ് രാജിവയ്ക്കും വരെ പ്രക്ഷോഭം തുടരുമെന്നും പറഞ്ഞു.
കോണ്ഗ്രസ് പാര്ലമെന്ററി പാര്ട്ടി ലീഡര് എന്. ഷൈലജ, സെക്രട്ടറി ഇ.വി. രാജു, പി. രാധാകൃഷ്ണന്, സുനിത ചാര്ളി, ബിന്ദു കാരയ്ക്കച്ചിറ എന്നിവര് നേതൃത്വം നല്കി.
