ബെര്മിങ്ഹാം: തുടര്ച്ചയായ രണ്ടാം ഫൈനല് ലക്ഷ്യമിട്ട് ഓസ്ട്രേലിയ നാളെ സെമി പോരാട്ടത്തിനിറങ്ങുന്നു. ആതിഥേയരായ ഇംഗ്ലണ്ടാണ് എതിരാളികള്. പ്രാഥമിക റൗണ്ടില് ഇന്ത്യക്ക് പിന്നില് രണ്ടാം സ്ഥാനക്കാരായാണ് ഓസ്ട്രേലിയ സെമിയിലേക്ക് കയറിയത്. കളിച്ച ഒമ്പത് കളികളില് 7 വിജയവും രണ്ട് പരാജയവുമടക്കം 14 പോയിന്റാണ് അവര് നേടിയത്. അതേസമയം ഇംഗ്ലണ്ട് 6 ജയവും മൂന്ന് തോല്വിയുമടക്കം 12 പോയിന്റുമായി മൂന്നാം സ്ഥാനക്കാരായും. ഓസ്ട്രേലിയ ഇന്ത്യയോടും അവസാന മത്സരത്തില് ദക്ഷിണാഫ്രിക്കയോടുമാണ് തോറ്റത്. ഇംഗ്ലണ്ട് പാക്കിസ്ഥാന്, ശ്രീലങ്ക, ഓസ്ട്രേലിയ ടീമുകളോടും. ആദ്യ റൗണ്ടില് ഓസ്ട്രേലിയയോടേറ്റ പരാജയത്തിന് പകവീട്ടാനുള്ള അവസരം കൂടിയാണ് നാളെ ഇംഗ്ലണ്ടിനെ കാത്തിരിക്കുന്നത്.
ഇത്തവണ ലോകകപ്പ് ചരിത്രത്തിലെ ആറാം കിരീടമാണ് ഓസ്ട്രേലിയ ലക്ഷ്യമിടുന്നത്. ഇംഗ്ലണ്ട് മൂന്ന് തവണ റണ്ണറപ്പുകളായെങ്കിലും കിരീടം കിട്ടാക്കനിയാണ്. 1992നുശേഷം ആദ്യമായാണ് ഇംഗ്ലണ്ട് സെമിയില് കളിക്കാനിറങ്ങുന്നത്.
ഇംഗ്ലണ്ടിനെ അപേക്ഷിച്ച് മുന്തൂക്കം ഓസ്ട്രേലിയയ്ക്കുതന്നെയാണ്. ബാറ്റ്സ്മാന്മാരും ബൗളര്മാരും മികച്ച ഫോമിലാണ്. പ്രത്യേകിച്ച് ഡേവിഡ് വാര്ണറും ക്യാപ്റ്റന് ആരോണ് ഫിഞ്ചും വിക്കറ്റ് കീപ്പര് ബാറ്റ്സ്മാന് അലക്സ് ക്യാരിയും. മുന് നായകന് സ്റ്റീവ് സ്മിത്ത് ലോകകപ്പിന്റെ തുടക്കത്തില് മികച്ച ഫോമിലായിരുന്നെങ്കിലും പിന്നീട് പ്രകടനം മങ്ങി. ഡേവിഡ് വാര്ണര് ഇൗ ലോകകപ്പിലെ റണ് വേട്ടക്കാരില് രണ്ടാമതാണ്. 9 കളികളില് നിന്ന് മൂന്ന് വീതം സെഞ്ചുറിയും അര്ദ്ധശതകവുമായി 638 റണ്സാണ് അടിച്ചുകൂട്ടിയിട്ടുള്ളത്. ആരോണ് ഫിഞ്ച് 9 കളികളില് നിന്ന് 507 റണ്സും. രണ്ട് സെഞ്ചുറിയും മൂന്ന് അര്ധശതകവും ഇതിലുള്പ്പെടും. വെടിക്കെട്ട് ബാറ്റിങ് നടത്തുന്ന അലക്സ് ക്യാരിയുടെ ഫോമും ഓസ്ട്രേലിയക്ക് ഗുണം ചെയ്യും. എന്നാല് മധ്യനിര ഫോമിലല്ല. പ്രത്യേകിച്ചും കൂറ്റനടിക്കാരന് ഗ്ലെന് മാക്സ്വെല്. ഇതിനിടെ ഉസ്മാന് ഖവാജയ്ക്കും സ്റ്റോയിനിസിനും പരിക്കേറ്റതും കംഗാരുക്കള്ക്ക് തിരിച്ചടിയാണ്. ബൗളിങ്ങില് ഇംഗ്ലണ്ടിനേക്കാള് മുന്തൂക്കം ഓസീസിനുതന്നെ. മിച്ചല് സ്റ്റാര്ക്കും പാറ്റ് കുമ്മിന്സും ബെഹ്റന്ഡോര്ഫും അടങ്ങുന്ന ബൗളര്മാര് എതിരാളികളെ എറിഞ്ഞു വീഴ്ത്താന് കെല്പുള്ളവരാണ്.
അതേസമയം ഇംഗ്ലണ്ടും തികഞ്ഞ ആത്മവിശ്വാസത്തിലാണ്. ജോ റൂട്ടും ബെയര്സ്റ്റോവും ജാസണ് റോയ്യും ബെന് സ്റ്റോക്സുമടങ്ങുന്ന ബാറ്റിങ് നിര കരുത്തുറ്റതാണ്. ബൗളിങ്ങില് മാര്ക്ക് വുഡ്, ജോഫ്രെ ആര്ച്ചര്, ക്രിസ് വോക്സ് എന്നിവരും മികച്ച ഫോമിലാണ്.
