കൊച്ചി: കേരളത്തിന്റെ വികസനത്തിന് വന് കുതിപ്പേകുന്ന പദ്ധതിയുമായി മോദി സര്ക്കാര്. 100 ഏക്കര് ഭൂമിയില് എറണാകുളത്ത് പുതിയ റെയില്വേ ടെര്മിനല് നിര്മ്മിക്കാനാണ് കേന്ദ്ര സര്ക്കാരിന്റെ തീരുമാനം. ഇതിനായുള്ള സാധ്യത പഠനം ദക്ഷിണ റെയില്വേ ആരംഭിച്ചു. പദ്ധതിയുടെ സാങ്കേതിക വശങ്ങള് കൂടി പഠിച്ചതിന് ശേഷം മാസ്റ്റര് പ്ലാന് തയ്യാറാക്കും. മെട്രോ സിറ്റിയായി ഉയരുന്ന കൊച്ചിയിലെ നോര്ത്ത് – സൗത്ത് റെയില്വേ സ്റ്റേഷനുകള് പര്യാപ്തമല്ല എന്ന പരാതി പരിഹരിക്കാനാണ് റെയില്വേയുടെ ശ്രമം. ഇതോടെ പുതിയ സര്വ്വീസുകള് എറണാകുളത്ത് നിന്നും തുടങ്ങാന് സാധിക്കും. റെയില്വേ ടെര്മിനലിന്റെ സാധ്യത പഠനത്തിന് മുന്നോടിയായി റെയില്വേ ഉദ്യോഗസ്ഥര് എറണാകുളം എംപി ഹൈബി ഈഡനുമായി ചര്ച്ച നടത്തി
റെയില്വേയുടെ തന്നെ ഉടമസ്ഥതയിലുള്ള പൊന്നുരുന്നിയിലെ മാര്ഷല്ലിംഗ് യാര്ഡില് നൂറ് ഏക്കര് ഭൂമിയിലാണ് പുതിയ ടെര്മിനല് നിര്മ്മിക്കാന് റെയില്വേ ശ്രമിക്കുന്നത്. എറണാകുളത്തെ നിര്ദിഷ്ട റെയില്വേ ടെര്മിനലിന് പുതുതായി ഭൂമിയേറ്റെടുക്കേണ്ട കാര്യമില്ല. 110 ഏക്കര് ഭൂമി മാര്ഷല്ലിംഗ് യാര്ഡില് റെയില്വേയുടെ കൈവശമുണ്ട്.
മധ്യകേരളത്തില് നിന്നും മലബാറിലേക്കും തെക്കന് കേരളത്തിലേക്കും പാസഞ്ചര് സര്വ്വീസുകള് ശക്തിപ്പെടുത്താനും പുതിയ ട്രെയിന് സര്വ്വീസുകള് ആരംഭിക്കാനും കൂടുതല് പിറ്റ് ലൈനുകളും പ്ലാറ്റ് ഫോമുകളും ആവശ്യമാണ്. ഈ സാഹചര്യത്തിലാണ് ആറ് പിറ്റ്ലൈനുകളും പന്ത്രണ്ട് പ്ലാറ്റ് ഫോമുകളുമായി പുതിയൊരു ടെര്മിനല് എറണാകുളത്ത് പണിയാന് കേന്ദ്ര സര്ക്കാര് ഒരുങ്ങുന്നത്.
