ന്യൂദല്ഹി:സാമ്പത്തിക ഭരണ നിര്വഹണവും നിയമ പാലനവും തമ്മിലുള്ള ബന്ധത്തേക്കുറിച്ച് പ്രത്യേകം പരാമര്ശിച്ച് ധന, വാണിജ്യകാര്യ മന്ത്രി നിര്മലാ സീതാരമന് പാര്ലമെന്റില് അവതരിപ്പിച്ച 2018-19ലെ സാമ്പത്തിക സര്വേ. അനായാസ വ്യവസായാനുമതി സമീപനത്തിന് ഏറ്റവും പ്രധാന തടസ്സം നിയമപാലനത്തില് നേരിടുന്ന ദൗര്ബല്യമാണ് എന്ന് സര്വേ സൂചിപ്പിക്കുന്നു. അപേക്ഷകള്ക്ക് സമയ ബന്ധിതമായി പരിഹാരമുണ്ടാക്കുകയും നിയമപാലനത്തിന് ഏകതാനത ഉണ്ടാവുകയും വേണം.
” രാജ്യത്തെ നീതിന്യായസംവിധാനത്തില് 3.5 കോടി കേസുകള് കെട്ടിക്കിടക്കുന്നത് യാദൃശ്ചികമല്ല. അതിലേറെയും ജില്ലാ കോടതികളിലും അതിനു താഴെയുമാണ്. 87.5 ശതമാനം കേസുകള് കെട്ടിക്കിടക്കുന്നതും അവിടെയാണ്” സര്വേയില് ചൂണ്ടിക്കാണിക്കുന്നു. ഈ രംഗത്ത് പരിഷ്കരണം ആവശ്യമാണ്. നിയമ പരിപാലന രംഗത്തെ കുറഞ്ഞ നിക്ഷേപം സാമ്പത്തിക വളര്ച്ചയ്ക്കും മെച്ചപ്പെട്ട സാമൂഹിക ജീവിതത്തിനും പ്രധാന തടസ്സമാണ്.
കിട്ടാക്കടങ്ങള് പിരിച്ചെടുക്കുന്നതിനും ചരക്കു സേവന നികുതി നടപ്പാക്കുന്നതിനും ഗവണ്മെന്റ് പ്രകടിപ്പിക്കുന്ന ഇഛാശക്തി സാമ്പത്തിക സര്വേ ഉയര്ത്തിപ്പിടിക്കുന്നു. ഇത് അനായാസ വ്യവസായവല്ക്കരണത്തെ സഹായിക്കും. ഈ കാര്യത്തില് 142ല് നിന്ന് 77-ാ റാങ്കിലേക്ക് കഴിഞ്ഞ നാലു വര്ഷംകൊണ്ട് ഇന്ത്യ ചാടിക്കടന്നതായും സര്വേ വ്യക്തമാക്കുന്നു.
കാര്യക്ഷമത വര്ധിപ്പിക്കുകയും അഞ്ച് വര്ഷത്തെ കെട്ടിക്കിടക്കുന്ന കേസുകള് നികത്തുകയും ചെയ്യാന് അധികം ജഡ്ജിമാര് വേണം. നന്നായി പ്രവര്ത്തിക്കുന്നതും മികവു പ്രകടമാക്കി സാമ്പത്തിക, സാമൂഹിക രംഗങ്ങളില് ബഹുമുഖ ഫലം നല്കുന്നതുമായ നിയമ സംവിധാനത്തിനാണ് സാമ്പത്തിക സര്വേയില് ശുപാര്ശ. ഇതാണ് ഇന്ത്യക്ക് ചെയ്യാവുന്ന ഏറ്റവും മികച്ച നിക്ഷേപം. പരമ്പരാഗത വിശ്വാസങ്ങള് വച്ചു പുലര്ത്തിക്കൊണ്ട് പ്രശ്നങ്ങള് പരിഹരിക്കാം എന്ന് കരുതുന്നത് പരസ്പരവിരുദ്ധമാണ്.
ഉത്തര്പ്രദേശ്, ബീഹാര്, ഒഡീഷ, ബംഗാള് സംസ്ഥാനങ്ങളില് കൂടുതല് ശ്രദ്ധ ആവശ്യമുള്ളവിധം കെട്ടിക്കിടക്കുന്ന കേസുകളുടെ എണ്ണം കൂടുതലാണ്. അധികം ജഡ്ജിമാരെ നിയമിക്കുന്നതില് ഈ സംസ്ഥാനങ്ങള്ക്ക് ഉയര്ന്ന മുന്ഗണന നല്കണമെന്നും സര്വേ നിര്ദേശിക്കുന്നു. നീതിപാലന സംവിധാനത്തിന്റെ ഉല്പ്പാദനക്്ഷമത വര്ധിപ്പിക്കാന് സര്വേയിലുള്ള മറ്റു നിര്ദേശങ്ങള്: പ്രവൃത്തി ദിനങ്ങള് വര്ധിപ്പിക്കുക;
നിയമപരിപാലന സംവിധാനത്തിന്റെ ഭരണപരമായ കാര്യങ്ങളില് പ്രത്യേക ശ്രദ്ധ ചെലുത്താന് ഇന്ത്യന് കോര്ട്ട്സ് ആന്റ് ട്രൈബ്യൂണല് സര്വീസസ് സ്ഥാപിക്കുക; കോടതികളുടെ കാര്യക്ഷമത വര്ധിപ്പിക്കുന്നതിന് സാങ്കേതികവിദ്യ കൂടുതലായി ഉപയോഗപ്പെടുത്തുക. ഉദാഹരണത്തിന്, നിയമ, നീതിന്യായ മന്ത്രാലയം ഘട്ടങ്ങളായി നടപ്പാക്കിയ കോര്ട്ട്സ് മിഷന് മോഡ് പദ്ധതി, നാഷണല് ജുഡീഷ്യല് ഡേറ്റ ഗ്രിഡ് എന്നിവ നടപ്പിലാക്കണമെന്നും സര്വ്വെ നിര്ദ്ദേശിക്കുന്നു.
