ഗുരുവായൂര്: തന്ത്രിയുടേയും ഹിന്ദു സംഘടനകളുടേയും പ്രതിഷേധത്തിന് മുന്പില് ദേവസ്വം ചെയര്മാനും ഭരണസമിതിയും മുട്ടുമടക്കി. തന്ത്രിയുടെ അനുമതിയില്ലാതെ ക്ഷേത്രത്തില് നടപ്പിലാക്കിയ പറ വഴിപാട് ദേവസ്വം നിര്ത്തലാക്കി. തിങ്കളാഴ്ച വൈകീട്ടാണ് ക്ഷേത്രത്തില് ദേവസ്വം ചെയര്മാന് അഡ്വ: കെ.ബി. മോഹന്ദാസ് കൂടിയാലോചനകളില്ലാതെ പറ വഴിപാട് ആരംഭിച്ചത്. ബിജെപി അടക്കമുള്ളവര് ഇതിനെതിരെ പ്രതിഷേധവുമായി മുന്നോട്ട് വന്നു.
തന്ത്രിയുടെ അനുമതിയില്ലാതെ ആരംഭിച്ച വഴിപാടിനെതിരെ വലിയ തന്ത്രി ചേന്നാസ് നാരായണന് നമ്പൂതിരിപ്പാട് ദേവസ്വം അഡ്മിനിസ്ട്രേറ്റര്ക്ക് വിയോജനകുറിപ്പ് നല്കിയിരുന്നു. തീരുമാനം പിന്വലിച്ചതായി അഡ്മിനിസ്ട്രേറ്റര് ഇന്നലെ തന്ത്രിമുഖ്യന് രേഖാമൂലം കത്ത് നല്കി. ഇത് രണ്ടാം തവണയാണ് തന്ത്രിയോട് ആലോചിക്കാതെ ക്ഷേത്രത്തില് നടപ്പിലാക്കിയ തീരുമാനം പിന്വലിക്കേണ്ടി വരുന്നത്.
ക്ഷേത്രദര്ശനത്തിനെത്തുന്ന ഭക്തജനങ്ങള്ക്കായി അന്നലക്ഷ്മി ഹാളില് ദേവസ്വം ഒരുക്കിയ പ്രസാദ ഊട്ടിലും ചെയര്മാന് മുന്പ് തന്നിഷ്ട പ്രകാരം പരിഷ്ക്കാരം വരുത്തിയിരുന്നു. ക്ഷേത്രാചാരങ്ങള് പാലിക്കാതെ എല്ലാവര്ക്കും പ്രസാദഊട്ടില് പങ്കെടുക്കാവുന്ന തരത്തില് പരിഷ്ക്കാരങ്ങള് വരുത്തിയത് തന്ത്രിയുടേയും, ഭക്തജനങ്ങളുടേയും ശക്തമായ പ്രതിഷേധത്തിന്റെ ഭാഗമായി പിന്വലിക്കേണ്ടിവന്നു.
സിപിഎം നിലപാട് ക്ഷേത്രത്തില് നടപ്പിലാക്കണ്ട: എ. നാഗേഷ്
ഗുരുവായൂരിലെ ആചാരാനുഷ്ഠാനങ്ങള് തകര്ക്കാന് ശ്രമിക്കുന്ന ദേവസ്വം ചെയര്മാന് അഡ്വ. കെ.ബി. മോഹന്ദാസിന്റെ വസതിയിലേക്ക് യുവമോര്ച്ച മാര്ച്ച് നടത്തി. മാര്ച്ച് വസതി എത്തും മുന്പ് പോലീസ് തടഞ്ഞു. തുടര്ന്ന് നടന്ന ധര്ണ ബിജെപി ജില്ലാ പ്രസിഡന്റ് എ. നാഗേഷ് ഉദ്ഘാടനം ചെയ്തു. തന്ത്രിയുമായി കൂടിയാലോചിക്കാതെ ക്ഷേത്ര ആചാരങ്ങളിലും വഴിപാടുകളിലും മാറ്റം വരുത്തുന്നതും സിപിഎം നിലപാടുകളും ക്ഷേത്രത്തില് നടപ്പിലാക്കാന് വന്നാല് കൈയ്യുംകെട്ടി നോക്കി നില്ക്കില്ലെന്ന് അദ്ദേഹം പറഞ്ഞു. യുവമോര്ച്ച ജില്ലാ പ്രസിഡന്റ് പി. ഗോപിനാഥ് അധ്യക്ഷനായി.
ജില്ലാ ജനറല് സെക്രട്ടറി കെ.പി. ജോര്ജ്ജ്, ജില്ലാ വൈസ് പ്രസിഡന്റ് സുരേന്ദ്രന് ഐനിക്കുന്നത്ത്, ജില്ലാ സെക്രട്ടറി അഡ്വ. ടി.എസ്. ഉല്ലാസ് ബാബു, ജില്ലാ ട്രഷറര് ഇ.വി. കൃഷ്ണന് നമ്പൂതിരി, കര്ഷക മോര്ച്ച സംസ്ഥാന ജന. സെക്രട്ടറി എ.ആര്. അജിഘോഷ്, യുവമോര്ച്ച ജില്ലാ സെക്രട്ടറി കെ.പി. വിഷ്ണു തുടങ്ങിയവര് സംസാരിച്ചു.
