ലണ്ടന്: ഇന്ത്യന് ഓപ്പണര് ശിഖര് ധവാന് പരിക്കേറ്റ് ടീമില് നിന്ന് പുറത്തായതിനു പിന്നാലെ ഓള് റൗണ്ടര് വിജയ് ശങ്കറും ലോകകപ്പ് ടീമില് നിന്ന് പുറത്തായി. ഇതോടെ ഐസിസിയുടെ അനുവാദത്തോടെ പകരക്കാരനെ ഇംഗ്ലണ്ടിലേക്ക് അയയ്ക്കും. കര്ണാടകക്കാരനായ മായങ്ക് അഗര്വാള് പകരക്കാരനാകുമെന്നാണ് റിപ്പോര്ട്ട്. ഇംഗ്ലണ്ടിനെതിരായ മത്സരത്തില് വിജയ് ശങ്കര് ഇന്ത്യന് ജേഴ്സി അണിഞ്ഞിരുന്നില്ല. ഈ സാഹചര്യത്തില് യുവതാരം ഋഷഭ് പന്ത് ലോകകപ്പില് അരങ്ങേറുകയും ചെയ്തിരുന്നു.
‘കഴിഞ്ഞ ദിവസം പരിശീലനത്തിനിടെ ജസ്പ്രീത് ബുംറയുടെ ഏറുകൊണ്ട് വിജയ് ശങ്കറിന്റെ കാല്വിരലിനു പരിക്കേറ്റിരുന്നു. അദ്ദേഹത്തിന്റെ അവസ്ഥ ഇനിയും മെച്ചപ്പെട്ടിട്ടില്ല. ലോകകപ്പില് തുടര്ന്നു കളിക്കാനാകുമെന്നും കരുതാന് വയ്യ. അദ്ദേഹത്തെ ഉടന് നാട്ടിലേക്ക് തിരിച്ചയയ്ക്കും’ ബിസിസിഐ വൃത്തങ്ങളെ ഉദ്ധരിച്ച് വാര്ത്താ ഏജന്സിയായ പിടിഐ റിപ്പോര്ട്ട് ചെയ്തു.
ആദ്യമെറിഞ്ഞ പന്തില്ത്തന്നെ വിക്കറ്റ് സ്വന്തമാക്കി ചരിത്രമെഴുതിക്കൊണ്ടാണ് വിജയ് ശങ്കര് ലോകകപ്പ് അരങ്ങേറ്റം കുറിച്ചത്. ഇതുവരെ മൂന്നു മത്സരങ്ങള് കളിച്ചു. പാക്കിസ്ഥാനെതിരായ മത്സരത്തിനിടെ ഭുവനേശ്വര് കുമാര് പരിക്കേറ്റ് മടങ്ങിയതിനെ തുടര്ന്ന് ഓവര് പൂര്ത്തിയാക്കാനെത്തിയാണ് വിജയ് ശങ്കര് കന്നി ലോകകപ്പ് വിക്കറ്റ് നേടിയത്. ഈ മത്സരത്തില് നേടിയ രണ്ടു വിക്കറ്റുകളാണ് മൂന്നു മത്സരങ്ങളില്നിന്നുള്ള സമ്പാദ്യം. മൂന്ന് ഇന്നിങ്സുകളില്നിന്നായി 58 റണ്സും നേടി.
സ്റ്റാന്ഡ് ബൈ താരങ്ങളുടെ പട്ടികയിലുള്ള അമ്പാട്ടി റായുഡുവിനെ മറികടന്നാണ് മായങ്കിനെ സെലക്ടര്മാര് പരിഗണിച്ചത്. അതേസമയം, മായങ്ക് രാജ്യാന്തര ക്രിക്കറ്റില് ഇതുവരെ ഏകദിനത്തില് കളിച്ചിട്ടുമില്ല. മായങ്ക് ഇന്ത്യക്കായി രണ്ട് ടെസ്റ്റുകള് മാത്രമാണ് കളിച്ചിട്ടുള്ളത്. 2018 ഡിസംബറിലും 2019 ജനുവരിയിലുമായി ഓസ്ട്രേലിയയ്ക്കെതിരെ. രണ്ട് ടെസ്റ്റുകളിലും നിന്ന് രണ്ട് അര്ധസെഞ്ചുറികള് സഹിതം 65.00 ശരാശരിയില് 195 റണ്സും നേടി. 77 റണ്സാണ് ഉയര്ന്ന സ്കോര്.
