ലണ്ടന്: പേസര് ട്രെന്റ് ബോള്ട്ട് ലോകകപ്പില് ഹാട്രിക്ക് നേടുന്ന ആദ്യ ന്യൂസിലന്ഡ് താരമായി. പക്ഷെ ഈ ഹാട്രിക്കിനും നിലവിലെ ചാമ്പ്യന്മാരായ ഓസ്ട്രേലിയയെ പിടിച്ചുകെട്ടാനായില്ല. നിര്ണായക മത്സരത്തില് 86 റണ്സിന് ന്യൂസിലന്ഡ് ഓസീസിനോട് തോറ്റു. ഈ തോല്വി ന്യൂസിലന്ഡിന്റെ സെമി പ്രതീക്ഷകള്ക്ക് തിരിച്ചടിയായി. അവസാന ലീഗ് മത്സരത്തില് ഇംഗ്ലണ്ടിനെ കീഴ്പ്പെടുത്തിയാലേ കിവീകളുടെ സെമി സ്വപ്നം യാഥാര്ത്ഥ്യമാകൂ.
എട്ട് മത്സരങ്ങളില് പതിനൊന്ന് പോയിന്റുമായി ന്യൂസിലന്ഡ് മൂന്നാം സ്ഥാനത്താണ്. അതേസമയം എട്ട്് മത്സരങ്ങളില് പതിനാലു പോയിന്റുമായി ഓസീസ് ഒന്നാം സ്ഥാനത്ത് തുടരുകയാണ്.
ഓസീസിന്റെ ഉസ്മാന് ഖവാജ, മിച്ചല് സ്റ്റാര്ക്ക്, ജേസണ് ബെഹറന്ഡോഫ് എന്നിവരെ തുടര്ച്ചയായ പന്തുകളില് പുറത്താക്കിയാണ് ബോള്ട്ട് ഹാട്രിക്ക് കുറിച്ചത് . ഈ ലോകകപ്പിലെ രണ്ടാം ഹാട്രിക്കാണിത്. നേരത്തെ ഇന്ത്യന് താരം മുഹമ്മദ് ഷമിയും ഹാട്രിക്ക് നേടിയിരുന്നു.
ടോസ് നേടി ബാറ്റിങ്ങ് തെരഞ്ഞെടുത്ത ഓസീസ് 22 ഓവറില് അഞ്ചിന് 92 റണ്സെന്ന നിലയിലായിരുന്നു. പക്ഷെ ഉസ്മാന് ഖവാജയും അലക്സ് ക്യാരിയും ചേര്ന്ന് ടീമിനെ കരയകറ്റി. 50 ഓവറില് ഒമ്പത് വിക്കറ്റിന് 243 റണ്സ് എടുത്തു.ഖവാജ 88 റണ്സും ക്യാരി 71 റണ്സും നേടി. ആറാം വിക്കറ്റില് ഇവര് 107 റണ്സ് അടിച്ചെടുത്തു. ബോള്ട്ട് പത്ത് ഓവറില് 51 റണ്സിന് ഹാട്രിക്ക് ഉള്പ്പെടെ അഞ്ചു വിക്കറ്റ് സ്വന്തമാക്കി.
244 റണ്സ് വിജയലക്ഷ്യത്തിനായി ബാറ്റേന്തിയ ന്യൂസിലന്ഡിനെ പേസര്മാരായ മിച്ചല് സ്റ്റാര്ക്കും ബെഹറന്ഡോഫും എറിഞ്ഞു വീഴ്ത്തി. 34.4 ഓവറില് 157 റണ്സിന് ന്യൂസിലന്ഡ് ബാറ്റ് താഴ്ത്തി. മിച്ചല് സ്റ്റാര്ക്ക് 9.4 ഓവറില് 26 റണ്സിന് അഞ്ചു വിക്കറ്റ് വീഴ്ത്തി. ബെഹറന്ഡോഫ് ഒമ്പത് ഓവറില് 31 റണ്സിന് രണ്ട് വിക്കറ്റ് വീഴ്്ത്തി.
ന്യൂസിലന്ഡ് ക്യാപ്റ്റന് കെയിന് വില്യംസിന് മാത്രമേ പിടിച്ചുനില്ക്കാനായുള്ളൂ. 51 പന്തില് രണ്ട് ഫോറും ഒരു സിക്സറും അടക്കം 40 റണ്സ് നേടി ടോപ്പ്സ്കോററായി. റോസ് ടെയ്ലര് 30 റണ്സും ഓപ്പണര് ഗുപ്ടില് 20 റണ്സും കുറിച്ചു.
ന്യൂസിലന്ഡിന്റെ അഞ്ചു വിക്കറ്റുകള് വീഴ്ത്തിയ മിച്ചല് സ്റ്റാര്ക്ക് ലോകകപ്പിലെ ലീഡിങ്ങ് വിക്കറ്റ് കീപ്പറായി. എട്ട് മത്സരങ്ങളില് സ്റ്റാര്ക്കിന് 24 വിക്കറ്റുകളായി.
