കോട്ടയം: മുന്നാക്ക വിഭാഗത്തില് സാമ്പത്തികമായി പിന്നാക്കം നില്ക്കുന്നവരുടെ ക്ഷേമത്തിനായി സ്ഥാപിച്ച സംസ്ഥാന മുന്നാക്ക സമുദായക്ഷേമ കോര്പ്പറേഷനും, മുന്നാക്ക സമുദായ കമ്മീഷനും പ്രവര്ത്തിക്കുന്നുണ്ടെങ്കിലും ഇതിന്റെ ആനുകൂല്യം അര്ഹതപ്പെട്ടവര്ക്ക് ലഭിക്കുന്നില്ലെന്ന് എന്എസ്എസ് ജനറല് സെക്രട്ടറി ജി. സുകുമാരന് നായര്. ഇത് സര്ക്കാരിന്റെ വീഴ്ചയാണെന്നും മുന്നാക്ക സമുദായങ്ങളോടുള്ള സര്ക്കാരിന്റെ അവഗണനയും കടുത്ത വിവേചനവുമാണ് ഇത് തെളിയിക്കുന്നതെന്നും സുകുമാരന് നായര് പ്രസ്താവനയില് കുറ്റപ്പെടുത്തി.
മുന്നാക്ക സമുദായങ്ങളിലെ പാവപ്പെട്ട പെണ്കുട്ടികളുടെ വിവാഹച്ചെലവുകള്ക്ക് ധനസഹായം നല്കുന്നതിന് മംഗല്യസമുന്നതി, പാവപ്പെട്ട വിദ്യാര്ത്ഥികള്ക്കുള്ള മെറിറ്റ് സ്കോളര്ഷിപ്പ്, സ്വയംസഹായ സംഘങ്ങള്ക്കുള്ള ടേം ലോണ് അസിസ്റ്റന്സ്, അഭ്യസ്തവിദ്യരായ തൊഴിലന്വേഷകര്ക്ക് കോച്ചിങ് അസിസ്റ്റന്സ്, ഭവനരഹിതരെ സഹായിക്കുന്നതിനുള്ള ഭവനസമുന്നതി തുടങ്ങിയ പദ്ധതികളില് നിന്നാണ് ആനുകൂല്യങ്ങള് ലഭിക്കാത്തത്. 2016ല് രൂപീകരിച്ച മുന്നാക്ക സമുദായ കമ്മീഷന് ആവശ്യമായ പഠനം നടത്തി അവരുടെ കാലാവധി തീരുന്നതിന് മുമ്പുതന്നെ 19.3.2019ല് റിപ്പോര്ട്ട് മുഖ്യമന്ത്രിക്ക് സമര്പ്പിച്ചതാണ്.
കമ്മീഷന്റെ കാലാവധിതീര്ന്ന് പിരിയുന്നതിനുമുമ്പ് പുതിയകമ്മീഷനെ നിയമിക്കുകയോ, അല്ലാത്തപക്ഷം പുതിയ കമ്മീഷന് നിലവില് വരുന്നതുവരെ പഴയകമ്മീഷന് തുടരാനുള്ള അനുവാദം നല്കുകയോ സര്ക്കാര് ചെയ്തില്ല. നിലവില്വന്ന പുതിയ കമ്മീഷനിലെ മെമ്പര്സെക്രട്ടറിക്ക് യോഗ്യത ഇല്ലാത്തതിന്റെ പേരില് ചുമതല ഏറ്റെടുക്കാന് സാധിച്ചിട്ടില്ല.
അതേസമയം പുതിയ മെമ്പര്സെക്രട്ടറിയെയും ഇതുവരെ തെരഞ്ഞെടുക്കാന് കഴിഞ്ഞിട്ടില്ല. പുതിയ കമ്മീഷന് നിലവിലിരിക്കെത്തന്നെ മുന്നാക്കവിഭാഗങ്ങളിലെ സാമ്പത്തികമായി പിന്നാക്കം നില്ക്കുന്നവര്ക്ക് കേന്ദ്രസര്ക്കാര് പുറപ്പെടുവിച്ച 10 ശതമാനം സംവരണത്തിനുള്ള മാനദണ്ഡങ്ങള് നിശ്ചയിച്ച് സര്ക്കാരിന് സമര്പ്പിക്കുന്നതിനായി രണ്ടംഗകമ്മീഷനെ നിയമിച്ചിരുന്നു. മൂന്നുമാസത്തിനകം സര്ക്കാരിന് ഇതുമായി ബന്ധപ്പെട്ട റിപ്പോര്ട്ട് സമര്പ്പിക്കാനായിരുന്നു നിര്ദ്ദേശം.
എന്നാല് ഇന്നേവരെ യാതൊരു നടപടിയും സ്വീകരിച്ചിട്ടില്ല. മുന്കമ്മീഷന് സര്ക്കാര് മുമ്പാകെ സമര്പ്പിച്ച റിപ്പോര്ട്ടിലെ ശുപാര്ശകള് എന്തൊക്കെയാണെന്ന് അറിയാന് ജനങ്ങള്ക്ക് അവകാശമുണ്ട്. മുന്നാക്കവിഭാഗത്തില് എത്ര സമുദായങ്ങളുണ്ടെന്ന് റിപ്പോര്ട്ടില് പറഞ്ഞിട്ടുണ്ടെന്നാണ് അറിയുന്നത്.
അത് ഏതൊക്കെയെന്ന് ഒരു വിജ്ഞാപനത്തിലൂടെ പരസ്യപ്പെടുത്താന്പോലും സര്ക്കാര് ഇതുവരെ തയ്യാറായിട്ടില്ലന്നാണ് അറിയാന് കഴിയുന്നത്. ഈ രണ്ട് സ്ഥാപനങ്ങളുടെയും പ്രവര്ത്തനങ്ങള്ക്ക് അനുയോജ്യമായ ഓഫീസുകളും പ്രാപ്തരായ ഉദ്യോഗസ്ഥരെയും യഥാസമയത്തുള്ള ഫണ്ടും നല്കുന്ന കാര്യത്തില് ഗവണ്മെന്റിന്റെ ഭാഗത്തുനിന്നും തികഞ്ഞ അനാസ്ഥയാണ് ഉള്ളത്. ഇത് പ്രതിഷേധാര്ഹമാണെന്നും ജി. സുകുമാരന് നായര് പ്രസ്താവനിയില് പറഞ്ഞു.
