മാഞ്ചസ്റ്റര്: ഇന്ത്യന് ക്യാപ്റ്റന് വിരാട് കോഹ് ലിയുടെ തൊപ്പിയില് മറ്റൊരു തൂവല് കൂടി. രാജ്യാന്തര ക്രിക്കറ്റില് അതിവേഗം ഇരുപതിനായിരം റണ്സ് തികയക്കുന്ന കളിക്കാരനെന്ന റെക്കോഡ് ഇനി കോഹ് ലിക്ക് സ്വന്തം.
ലോകകപ്പില് വിന്ഡീസിനെതിരായ മത്സരത്തില് സ്കോര് 37 റണ്സിലെത്തിയതോടെയാണ് കോഹ്ലിക്ക് രാജ്യാന്തര ക്രിക്കറ്റില് ഇരുപതിനായിരം റണ്സായത്.
417 ഇന്നിങ്ങ്സിലാണ് കോഹ്ലിയുടെ ഈ നേട്ടം. (ടെസ്റ്റില് 131 ഇന്നിങ്ങ്സ്, ഏകദിനം 224, ടി ട്വന്റി 62).
ഇതിഹാസങ്ങളായ സച്ചിന് ടെന്ഡുല്ക്കറും ബ്രയാന് ലാറയും കുറിച്ചിട്ട റെക്കോഡാണ് കോഹ്ലി മറികടന്നത്. സച്ചിനും ലാറയും 453 ഇന്നിങ്ങ്സിലാണ് ഇരുപതിനായിരം തികച്ചത്. ഓസ്ട്രേലിയയുടെ മുന് നായകന് റിക്കി പോണ്ടിങ്ങാണ് മൂന്നാം സ്ഥാനത്ത്. പോണ്ടിങ്ങ് 468 ഇന്നിങ്ങ്സിലാണ് ഇരുപതിനായിരം നേടിയത്.
രാജ്യാന്തര ക്രിക്കറ്റില് ഇരുപതിനായിരം റണ്സ് നേടുന്ന മൂന്നാമത്തെ ഇന്ത്യന് താരവും പന്ത്രണ്ടാമത്തെ ലോക ക്രിക്കറ്ററുമാണ്. ടെന്ഡുല്ക്കര് (34,357), രാഹുല് ദ്രാവിഡ് (24,208) എന്നിവരാണ് കോഹ്ലിക്ക് മുമ്പ് ഇരുപതിനായരിം തികച്ച ഇന്ത്യന് താരങ്ങള്.
ഈ ലോകകപ്പില് മികച്ച ഫോം തുടരുകയാണ് കോഹ്ലി. വിന്ഡീസിനെതിരായ മത്സരത്തില് ഇരുപതിനായിരം റണ്സ് തികച്ച ഇന്ത്യന് നായകന് ഏകദിനത്തില് മൂന്നാം നമ്പറില് ഒമ്പതിനായിരം റണ്സും കടന്നു. ലോകകപ്പിലെ ആദ്യ മത്സരത്തില് ദക്ഷിണാഫ്രിക്കക്കെതിരെ അനായാസം പുറത്തായ കോഹ്ലി ഓസീസിനെതിരെ 82 റണ്സും പാക്കിസ്ഥാനെതിരെ 77 റണ്സും അഫ്ഗാനിസ്ഥാനെതിരെ 67 റണ്സും നേടി.
ഓള്ഡ് ട്രാഫോഡില് പാക്കിസ്ഥാനെതിരായ മത്സരത്തിനിടെ ഏകദിനത്തില് അതിവേഗം പതിനൊന്നായിരം റണ്സ് നേടുന്ന ബാറ്റ്സ്മാനെന്ന റെക്കോഡും കോഹ്ലിക്ക് സ്വന്തമായി.
