മോതിഹാരി : പ്രധാനമന്ത്രി നരേന്ദ്രമോദിക്ക് ലഭിച്ച പാരിതോഷികങ്ങളുടെ പ്രദര്ശനം ഒരുക്കി ബിഎഡ് കോളേജ്. വടക്കന് ബീഹാറിലെ മോതിഹാരി എന്ന ചെറിയ ടൗണിലെ ബിഎഡ് കോളേജാണ് മോദിയ്ക്ക് ലഭിച് ഉപഹാരങ്ങളെല്ലാം സൂക്ഷിച്ചുവെച്ച് ജനങ്ങള്ക്ക് കാണാനായി അവസരം ഒരുക്കിയിരിക്കുന്നത്.
സ്വച്ഛ് ഭാരത് യോജന, ഉജ്ജ്വല പദ്ധതി, സ്റ്റാര്ട്ട് അപ് ഇന്ത്യ തുടങ്ങി മോദി കൊണ്ടുവന്ന പദ്ധതികളുടെ ചിത്രീകരണവും ഇവിടെയുണ്ട്. ബുദ്ധ സ്തൂപം പോലെ രൂപകല്പ്പന ചെയ്ത ഒരു മൊമെന്റോയും ഇവിടെ സൂക്ഷിച്ചിട്ടുണ്ട്. ബി.ആര്. അംബേദ്കറുടെ സ്മാരകനിര്മാണം ആരംഭിച്ചതിന് ശേഷം മഹാരാഷ്ട്ര സര്ക്കാര് പ്രധാനമന്ത്രിക്ക് സമ്മാനിച്ചതാണിത്.
ദല്ഹിയില് ലേലത്തിന് വച്ച ആയിരത്തിലധികം മൊമെന്റോകളില് ചിലത് നേടാനായത് ബിഹാറില് തങ്ങള്ക്ക് മാത്രമാണെന്ന് കോളേജ് അധികൃതരായ രാധാകൃഷ്ണ സേവാ സന്സ്ഥാന്റെ തലവനായ യമുന സെകാരിയ പറയുന്നു. മോതിഹാരിയില് അറിയപ്പെടുന്ന സാമൂഹിക, പരിസ്ഥിതി പ്രവര്ത്തകനായ ശംഭു നാഥ് സെകരിയയുടെ മകനാണ് യമുന സെകാരിയ. മോദിയുടെ കടുത്ത ആരാധകയായ ഇയാള് പക്ഷേ ലേലത്തില് വാങ്ങിയ സാധനങ്ങളുടെ വില വെളിപ്പെടുത്താന് വിസമ്മതിച്ചു, ഇത് വാണിജ്യാവശ്യങ്ങള്ക്കായുള്ള വില്പ്പനയായിരുന്നില്ലെന്നാണ് സെകാരിയ അറിയിച്ചത്.
നമാമി ഗംഗ പദ്ധതിക്കായാണ് തനിക്ക് ലഭിച്ച പാരിതോഷികങ്ങള് ലേലം ചെയ്ത തുക മോദി ഉപയോഗിക്കുന്നത്. പ്രധാനമന്ത്രിയുടെ മൊമെന്റോകളുടെ ലേലത്തില് പങ്കെടുത്തവരെ അഭിനന്ദിച്ചുകൊണ്ട് നാഷണല് ഗാലറി ഓഫ് മോഡേണ് ആര്ട്സ് നല്കിയ സര്ട്ടിഫിക്കറ്റും കോളേജില് പ്രദര്ശിപ്പിച്ചിട്ടുണ്ട്.
