ശ്രീനഗര്: ജമ്മു കശ്മീരിലെ പുല്വാമയില് സുരക്ഷാസേനയുമായുണ്ടായ ഏറ്റുമുട്ടലില് ഒരു ഭീകരനെ വധിച്ചു. കൊല്ലപ്പെട്ട ഭീകരന്റെ മൃതദേഹം സൈന്യം കണ്ടെടുത്തിട്ടുണ്ട്. ഇയാളുടെ പക്കല് നിന്നും വെടിക്കോപ്പുകളും മറ്റ് ആയുധങ്ങളും സ്ഫോടക വസ്തുക്കളും കണ്ടെടുത്തു.
പുല്വാമ ജില്ലയിലെ ത്രാല് മേഖലയിലാണ് ഏറ്റുമുട്ടല് നടന്നത്. ത്രാല്, ബ്രാന്പതേരി മേഖലകളില് ഭീകരരുടെ സാന്നിധ്യം ഉണ്ടെന്നുള്ള രഹസ്യവിവരം ലഭിച്ചതിനെ തുടര്ന്ന നടത്തിയ തിരച്ചിലിനിടെ സുരക്ഷാസൈന്യത്തിനു നേരെ വെടിയുതിര്ക്കുകയായിരുന്നു. തുടര്ന്ന് സൈന്യം തിരിച്ചടിച്ചു. രാഷ്ട്രീയ റൈഫിള്സും എസ്ഒജിയും കശ്മീര് പോലീസും സംയുക്തമായാണ് തെരച്ചില് നടത്തിയത്.
പ്രദേശത്ത് തെരച്ചില് ശക്തമാക്കി കൂടുതല് സേനാംഗങ്ങള് എത്തിയിട്ടുണ്ട്. ഏറ്റുമുട്ടലിന്റെ അടിസ്ഥാനത്തില് പ്രദേശത്തെ ഇന്റര്നെറ്റ് സേവനങ്ങള് താത്കാലികമായി റദ്ദാക്കി.
