ലീഡ്സ്: ലോകകപ്പില് ഇംഗ്ലണ്ടിനെതിരായ മത്സരത്തില് ശ്രീലങ്കക്ക് മിന്നുന്ന ജയം സമ്മാനിച്ചത് മലിംഗയുടെ തകര്പ്പന് ബൗളിങ്ങ്. ഏറെ വലുതൊന്നുമല്ലാത്ത 50 ഓവറില് 233 റണ്സ് എന്ന ലക്ഷ്യത്തെ പിന്തുടര്ന്ന ഇംഗ്ലണ്ടിനെ എറിഞ്ഞിട്ടത് മലിംഗയുടെ പേസാണ്. ഒപ്പാം ഓഫ് സ്പിന്നര് ഇസ്റു ഉദാനയും. മലിംഗ 10 ഓവറില് 43 റണ്സിന് നാല് വിക്കറ്റ് പിഴുതപ്പോള് ഉദാന 8 ഓവറില് 41 റണ്സിന് രണ്ട് വിക്കറ്റ് വീഴ്ത്തി. ലോകകപ്പില് ഇംഗ്ലണ്ടിനെതിരെ ലങ്കയുടെ അഞ്ചാം വിജയമാണിത്.
മുന്നിരയെ തകര്ത്താണ് മലിംഗ ശ്രീലങ്കയ്ക്ക് 20 റണ്സിന്റെ ജയം സമ്മാനിച്ചത്. ഈ ലോകകപ്പില് ലങ്കയുടെ രണ്ടാം ജയമാണിത്. മലിംഗയുടെ ഏറില് വീണത് ഓപ്പണര്മാരായ ജെയിംസ് വിന്സ്, ജോണി ബെയര്സ്റ്റോ, ജോ റൂട്ട്, ജോസ് ബട്ട്ലര് എന്നീ വന്മരങ്ങള്. ഇൗ പ്രകടനത്തോടെ മലിംഗ മറ്റൊരു നേട്ടവും സ്വന്തമാക്കി. ലോകകപ്പില് 50 വിക്കറ്റുകള് വീഴ്ത്തുന്ന നാലാമത്തെ ബൗളറായി മാറി മലിംഗ. ലോകകപ്പില് ഏറ്റവും കുറച്ച് മത്സരങ്ങളില് നിന്ന് 50 വിക്കറ്റ് നേടുന്ന ബൗളര് എന്ന ബഹുമതി ഇനി മലിംഗക്ക് സ്വന്തം.
26 മത്സരങ്ങളിലെ 25 ഇന്നിങ്ങ്സില് നിന്നാണ് മലിംഗ ഈ നേട്ടം സ്വന്തമാക്കിയത്. ഓസ്ട്രേലിയയുടെ ഇതിഹാസം ഗ്ലെന് മക്ഗ്രാത്ത്, ശ്രീലങ്കയുടെ തന്നെ മുത്തയ്യ മുരളീധരന്, പാക് പേസര് വസിം അക്രം എന്നിവരാണ് ഈ നേട്ടം സ്വന്തമാക്കിയ മറ്റ് ബൗളര്മാര്. മക്ഗ്രാത്തും മുരളീധരനും 30 കളികളില് നിന്നും അക്രം 34 കളികളില് നിന്നുമാണ് 50 വിക്കറ്റ് തികച്ചത്. എന്നാല് ലോകകപ്പില് ഏറ്റവും കൂടുതല് വിക്കറ്റെടുത്തവര് ഈ മൂന്നുപേരുമാണ്. ഒന്നാമത് മക്ഗ്രാത്ത്. 39 കളില് നിന്ന് 71 വിക്കറ്റ്. മുരളീധരന് 40 കൡകളില് നിന്ന് 68 വിക്കറ്റും വസിം അക്രം 38 കളികളില് നിന്ന് 55 വിക്കറ്റും വീഴ്ത്തിയിട്ടുണ്ട്.
