ഹിറ്റര്‍ വാര്‍ണര്‍

നോട്ടിങ്ഹാം: തകര്‍ത്തടിച്ച് ഡേവിഡ് വാര്‍ണര്‍ കുറിച്ച സെഞ്ചുറിയില്‍ ഓസീസിന് കൂറ്റന്‍ സ്്‌കോര്‍. ബംഗ്ലാദേശിനെതിരായ മത്സരത്തില്‍ ടോസ് നേടി ബാറ്റ് ചെയ്ത ഓസ്‌ട്രേലിയ 50 ഓവറില്‍ അഞ്ചുവിക്കറ്റിന് 381 റണ്‍സ് എടുത്തു.

ബംഗ്ലാദേശ് ബൗളര്‍മാരെ അടിച്ചുപരത്തിയ വാര്‍ണര്‍ 147 പന്തില്‍ പതിനാല് ഫോറും അഞ്ച് സിക്‌സറും അടക്കം 166 റണ്‍സ് സ്വ്ന്തം പേരില്‍ കുറിച്ചിട്ടു. വാര്‍ണറുടെ ഈ ലോകകപ്പിലെ രണ്ടാം സെഞ്ചുറിയാണിത്.

ആദ്യ വിക്കറ്റില്‍ ക്യാപ്റ്റന്‍ ആരോണ്‍ ഫിഞ്ചിനൊപ്പം 121 റണ്‍സ് കൂട്ടിച്ചേര്‍ത്ത് വാര്‍ണര്‍ ഓസീസിന് കലക്കന്‍ തുടക്കം സമ്മാനിച്ചു. ഇതില്‍ ഫിഞ്ചിന്റെ സംഭാവന 53 റണ്‍സ്. 51 പന്തില്‍ അഞ്ചു ഫോറും രണ്ട് സിക്‌സറും അടിച്ചു.

ഖവാജയും വാര്‍ണറും രണ്ടാം വിക്കറ്റില്‍ 192 റണ്‍സ് അടിച്ചെടുത്തു. വാര്‍ണര്‍ വീണതോടെയാണ് ഈ കൂട്ടുകെട്ട് തകര്‍ന്നത്. ഖവാജ 72 പന്തില്‍ 89 റണ്‍സ് നേടി. പത്ത് പന്ത് ബൗണ്ടറി കടത്തി. മാക്‌സ്‌വെല്‍ പത്ത് പന്തില്‍ രണ്ട് ഫോറും മൂന്ന് സിക്‌സറും ഉള്‍പ്പെടെ 32 റണ്‍സ്  എടുത്തു. മുന്‍ നായകന്‍ സ്്മിത്ത് ഒരു റണ്ണിന് കീഴടങ്ങി.

സ്‌റ്റോയ്‌നിസ് 11 പന്തില്‍ 17 റണ്‍സുമായി പുറത്താകാതെ നിന്നു. എട്ട് പന്തില്‍ പതിനൊന്ന് റണ്‍സ് കുറിച്ച ക്യാരിയും പുറത്തായില്ല. ബംഗ്ലാദേശിന്റെ സൗമ്യ സര്‍ക്കാര്‍ എട്ട് ഓവറില്‍ 58 റണ്‍സിന് മൂന്ന് വിക്കറ്റുകള്‍ വീഴ്‌ത്തി.

ഓസ്‌ട്രേലിയന്‍ സ്‌കോര്‍ 49 ഓവറില്‍ അഞ്ചു വിക്കറ്റിന് 368 റണ്‍സിലെത്തിനില്‍ക്കെ മഴമൂലം കുറച്ചു സമയം കളി മുടങ്ങി.

സ്‌കോര്‍ബോര്‍ഡ്

ഓസ്‌ട്രേലിയ: ഡേവിഡ് വാര്‍ണര്‍ സി റൂബല്‍ ഹുസൈന്‍ ബി സൗമ്യ സര്‍ക്കാര്‍ 166, ആരോണ്‍ ഫിഞ്ച് സി റൂബല്‍ ഹുസൈന്‍ ബി സൗമ്യ സര്‍ക്കാര്‍ 53, ഖവാജ സി മുസ്താഫിക്വര്‍ റഹീം ബി സൗമ്യ സര്‍ക്കാര്‍ 89, മാക്‌സ്‌വെല്‍ റണ്‍ ഔട്ട് 32, സ്‌റ്റോയ്‌നിസ് നോട്ടൗട്ട് 17, സ്മിത്ത് എല്‍ബിഡബ്‌ളിയു ബി മുഹസ്താഫിസുര്‍ റഹ്മാന്‍ 1, ക്യാരി നോട്ടൗട്ട് 11, എക്‌സ്ട്രാസ് 12, ആകെ 50 ഓവറില്‍ അഞ്ചിന് 381.

വിക്കറ്റ് വീഴ്ച: 1-121, 2-313, 3-352, 4-353, 5-354

ബൗളിങ്ങ്: മൊര്‍ത്താസ 8-0-56-0, മുസ്താഫിസുര്‍ റഹ്മാന്‍ 9-0-69-1, ഷാക്കിബ് അല്‍ ഹസന്‍ 6-0-50-0, റൂബല്‍ ഹുസൈന്‍ 9-0-83-0, മെഹ്ദി ഹസന്‍ മിര്‍സ 10-0-59-0, സൗമ്യ സര്‍ക്കാര്‍ 8-0-58-3.