സാവോപോളോ: കോപ്പ അമേരിക്ക ചാമ്പ്യന്‍ഷിപ്പില്‍ ഹാട്രിക്ക് കിരീടം തേടിയിറങ്ങിയ ചിലിക്ക് തകര്‍പ്പന്‍ വിജയം. മറുപടിയില്ലാത്ത നാല് ഗോളുകള്‍ക്ക് ജപ്പാനെ അവര്‍ തകര്‍ത്തുവിട്ടു. വിജയികള്‍ക്കുവേണ്ടി എഡ്വേര്‍ഡോ വര്‍ഗാസ് രണ്ടും എറിക് പുള്‍ഗര്‍, അലക്‌സി സാഞ്ചസ് എന്നിവര്‍ ഓരോ ഗോളും നേടി.
തുടക്കത്തില്‍ തുല്യശക്തികളുടെ പോരാട്ടമായിരുന്നു മൈതാനത്ത്. ഇരു ഭാഗത്തേക്കും പന്ത് തുടര്‍ച്ചയായി കയറിയിറങ്ങി. എങ്കിലും പന്തടക്കത്തില്‍ നേരിയ മുന്‍തൂക്കം ചിലിക്കായിരുന്നു. ഷോട്ടുകള്‍ പായിക്കുന്നതിലും അവര്‍ മുന്നിട്ടുനിന്നു.
കളിയുടെ തുടക്കത്തില്‍ ജപ്പാനായിരുന്നു മികച്ച മുന്നേറ്റങ്ങള്‍ നടത്തിയത്. ആറാം മിനിറ്റില്‍ അവരുടെ ടെയ്‌ക്ഫുസ കുബോ ചിലി ബോക്‌സില്‍ ഭീതി പടര്‍ത്തിയെങ്കിലും ലക്ഷ്യം പിഴച്ചു. അധികം കഴിയും മുന്‍പ് ഷോയ നകാജമിയുടെ ഷോട്ട് ചിലി ഗോളി രക്ഷപ്പെടുത്തുകയും ചെയ്തു. 12-ാം മിനിറ്റില്‍ നോചിമി ഉഡയയുടെ ഷോട്ടും ചിലി ഗോളി രക്ഷപ്പെടുത്തി. ജപ്പാന്റെ മുന്നേറ്റങ്ങള്‍ക്ക് അതിവേഗ പ്രത്യാക്രമണത്തിലൂടെ ചിലി മറുപടി നല്‍കാന്‍ തീരുമാനിച്ചതോടെ കളി ആവേശകരമായി മാറി. തുടര്‍ന്ന് ഇരുടീമുകളും മികച്ച മുന്നേറ്റങ്ങളുമായി കളം നിറഞ്ഞു. ഒടുവില്‍ 41-ാം മിനിറ്റില്‍ മത്സരത്തിലെ ആദ്യഗോള്‍ പിറന്നു. ചാള്‍സ് അരാന്‍ഗ്വിസ് എടുത്ത കോര്‍ണര്‍ കിക്ക് ബോക്‌സിനുള്ളില്‍ നില്‍ക്കുകയായിരുന്ന എറിക് പുള്‍ഗര്‍ ബുള്ളറ്റ് ഹെഡ്ഡറിലൂടെ വലയിലേക്ക് തിരിച്ചുവിട്ടപ്പോള്‍ ജപ്പാന് ഗോളി നിസ്സഹായനായി. ഇതോടെ ആദ്യപകുതിയില്‍ ചിലി 1-0ന് മുന്നില്‍.
പിന്നീട് 54-ാം മിനിറ്റില്‍ ചിലി ലീഡ് ഉയര്‍ത്തി.മൗറിസിയോ ഇസ്‌ലയുടെ പാസ് സ്വീകരിച്ച് ബോക്‌സിന് പുറത്തുനിന്ന് വര്‍ഗാസ് പായിച്ച വലംകാല്‍ ഷോട്ടാണ് വലയില്‍ കയറിയത്. 82-ാം മിനിറ്റില്‍ അരാന്‍ഗ്വിസിന്റെ ക്രോസ് നല്ലൊരു ഹെഡ്ഡറിലൂടെ സാഞ്ചസ് വലയിലെത്തിച്ചു (3-0). തൊട്ടടുത്ത മിനിറ്റില്‍ സാഞ്ചസിന്റെ പാസ് സ്വീകരിച്ച് വര്‍ഗാസ് ബോക്‌സിന് പുറത്തുനിന്ന് പായിച്ച തകര്‍പ്പന്‍ ഷോട്ടും ജപ്പാന് വലയില്‍ കയറിയതോടെ ചിലിയുടെ ഗോള്‍ പട്ടിക പൂര്‍ത്തിയായി. വെള്ളിയാഴ്ച നടക്കുന്ന അടുത്ത മത്സരത്തില്‍ ജപ്പാന് എതിരാളികള്‍ ഉറുഗ്വെയാണ്. ശനിയാഴ്ച ചിലി ഇക്വഡോറിനെ നേരിടും.
