തിരുവനന്തപുരം: തലശ്ശേരിയിലെ സിപിഎം നേതാവ് കോടിയേരി ദാസന്‍ വധക്കേസില്‍ ആര്‍എസ്എസ് പ്രവര്‍ത്തകരെ കുടുക്കാന്‍ കോടതി രേഖകളില്‍ കൃത്രിമം കാട്ടിയത് അന്വേഷിക്കണമെന്ന് ബിജെപി സംസ്ഥാന അധ്യക്ഷന്‍ അഡ്വ.പി.എസ്. ശ്രീധരന്‍പിള്ള. രാഷ്‌ട്രീയ എതിരാളികളെ ക്രൂരമായി വേട്ടയാടുന്ന നാടായി സിപിഎം ഭരണകൂടം കേരളത്തെ മാറ്റിയെന്നും അദ്ദേഹം പറഞ്ഞു.
ക്രിമിനല്‍ കേസില്‍ ഹാജരാക്കുന്ന രേഖകള്‍ കോടതി സേഫില്‍ സുരക്ഷിതമെന്ന് ഉറപ്പുള്ള നാട്ടിലാണ് രേഖകളിലെ അഞ്ചാം പേജ് മാറ്റി പുതിയ പേജ് കൂട്ടിച്ചേര്‍ത്തത്. സിപിഎമ്മിന്റെ സ്വാധീനത്താലാണ് പേജ് മാറ്റല്‍. കോടിയേരി ദാസനെ ആര്‍എസ്എസ്, ബിജെപി പ്രവര്‍ത്തകര്‍ കൊന്നുവെന്ന കേസില്‍ പ്രതികളെ തലശ്ശേരി കോടതി വെറുതെ വിട്ടിരുന്നു. വിധിക്കെതിരെ ഹൈക്കോടതിയില്‍ അപ്പീല്‍ നല്‍കിയെങ്കിലും തലശ്ശേരി കോടതിയുടെ വിധി ഡിവിഷന്‍ ബെഞ്ച് ശരിവച്ചു.
കോടതിയില്‍ ഹാജരാക്കി സൂക്ഷിച്ച രേഖകളില്‍ പേജ് മാറ്റി പകരം പുതിയ പേജ് കൂട്ടിച്ചേര്‍ത്ത് ആര്‍എസ്എസ് പ്രവര്‍ത്തകനെ പ്രതിയാക്കിയെന്നായിരുന്നു കേസ് വിചാരണ നടത്തിയ തലശ്ശേരി കോടതിയുടെ കണ്ടെത്തല്‍. ഹൈക്കോടതിയും ഇത് ശരിവച്ചു. പേജ് മാറ്റിയത് അന്വേഷിക്കണമെന്ന് ഹൈക്കോടതി ഡിവിഷന്‍ ബെഞ്ചിലെ ജസ്റ്റിസുമാരായ എ.എം. ഷഫീക്കും എ.എം. ബാബുവും ആവശ്യപ്പെട്ടത്.
കോടതിക്കുള്ളിലെ രേഖകളില്‍ പോലും കൃത്രിമം കാട്ടി എതിരാളികളെ വേട്ടയാടി ജനാധിപത്യത്തെയും നിയമവാഴ്ചയെയും സംഘടിതമായി തകര്‍ക്കാനാണ് സിപിഎം ശ്രമിക്കുന്നത്. അതിനാല്‍, രേഖകളില്‍ കിത്രിമം കാട്ടിയ ഉദ്യോഗസ്ഥര്‍ക്കും സിപിഎം നേതാക്കള്‍ക്കുമെതിരെ അന്വേഷണം നടത്തി നടപടികള്‍ സ്വീകരിക്കാന്‍ സര്‍ക്കാര്‍ തയാറാകണമെന്നും ശ്രീധരന്‍പിള്ള ആവശ്യപ്പെട്ടു.
പ്രളയ ദുരിതാശ്വാസത്തിന് മുഖ്യമന്ത്രിയോടൊപ്പം മറ്റ് മന്ത്രിമാര്‍ വിദേശത്ത് പോകാനുള്ള നീക്കം തടഞ്ഞ കേന്ദ്ര സര്‍ക്കാരിന്റെ നടപടി ശരിയെന്ന് തെളിഞ്ഞു. സര്‍ക്കാര്‍ ചെലവില്‍ വിനോദ യാത്ര നടത്താനുള്ള നീക്കമായിരുന്നു. വിദേശത്ത് നിന്ന് ഫണ്ട് ലഭിക്കാന്‍ ഇടയില്ലെന്ന് അന്നേ കേന്ദ്ര സര്‍ക്കാര്‍ വ്യക്തമാക്കിയിരുന്നതായും ശ്രീധരന്‍പിള്ള പറഞ്ഞു.
