കൊച്ചി: കോഴിക്കോട് നാഷണല് വൈറോളജി ഇന്സ്റ്റിറ്റ്യൂട്ട് സ്ഥാപിക്കാന് കേന്ദ്രസര്ക്കാര് മൂന്നുകോടി അനുവദിച്ചുവെന്ന് ആരോഗ്യമന്ത്രി കെ.കെ. ശൈലജ. ഇന്ത്യന് കൗണ്സില് ഫോര് മെഡിക്കല് റിസര്ച്ച് (ഐസിഎംആര്) മെയ് 27 ന് അനുമതി നല്കിയെന്നും മന്ത്രി പറഞ്ഞു.
വൈറോളജി ഇന്സ്റ്റിറ്റ്യൂട്ടിനായി സംസ്ഥാനസര്ക്കാര് ഭരണാനുമതി നല്കിയിട്ടുണ്ട്. കേന്ദ്രആരോഗ്യമന്ത്രിയെ കണ്ട് കൂടുതല് തുക ആവശ്യപ്പെടും. നിലവില് ആലപ്പുഴയിലെ വൈറോളജി ഇന്സ്റ്റിറ്റ്യൂട്ട് കൂടുതല് മെച്ചപ്പെട്ടതാക്കാനും ആവശ്യപ്പെടുമെന്നും മന്ത്രി പറഞ്ഞു. ഇന്ന് ദില്ലിയിലേക്ക് പോകുന്ന മന്ത്രി കേന്ദ്ര ആരോഗ്യമന്ത്രിയെ കാണാന് സമയം ആവശ്യപ്പെട്ടിട്ടുണ്ട്.
അതേസമയം മുഖ്യമന്ത്രി പിണറായി വിജയന്റെ നേതൃത്വത്തില് ഫെബ്രുവരിയില് തിരുവന്തപുരത്ത് സ്ഥാപിച്ച വൈറോളജി ഇന്സ്റ്റിറ്റ്യൂട്ട് ഇതുവരെയും പ്രവര്ത്തനം ആരംഭിച്ചിട്ടില്ല. കോഴിക്കോട് നിപവൈറസ് ബാധിച്ചപ്പോള് സംസ്ഥാനസര്ക്കാര് ആവശ്യപ്പെട്ടത് പ്രകാരമാണ് കേന്ദ്രസര്ക്കാര് കോഴിക്കോട് വൈറോളജി ഇന്സ്റ്റിറ്റ്യൂട്ട് സ്ഥാപിക്കുന്നത്.
വവ്വാലുകളില് കൂടുതല് ഗവേഷണം നടത്താന് കേന്ദ്രത്തോട് ആവശ്യപ്പെടും: മുഖ്യമന്ത്രി
കൊച്ചി: വവ്വാലുകള് ഏത് ഘട്ടത്തിലാണ് നിപ വൈറസ് വാഹകരായി മാറുന്നതെന്ന് കണ്ടെത്തുന്നതിന് കൂടുതല് ഗവേഷണം നടത്താന് കേന്ദ്രസര്ക്കാരിനോട് ആവശ്യപ്പെടുമെന്ന് മുഖ്യമന്ത്രി പിണറായി വിജയന്. നിപവൈറസ് സംബന്ധിച്ച് എറണാകുളത്ത് നടന്ന അവലോകന യോഗത്തിന് ശേഷം മാധ്യമപ്രവര്ത്തകരോട് സംസാരിക്കുകയായിരുന്നു മുഖ്യമന്ത്രി.
നിലവില് പഴംതീനി വവ്വാലുകളിലൂടെ വൈറസ് പകരുന്നു എന്നാണ് നിഗമനം. അതുകൊണ്ട് വവ്വാലുകളുടെ പ്രജനനസമയം, വൈറസ് എത്രനേരം വവ്വാലുകളില് നിലനില്കും, മറ്റേതെല്ലാം അവസ്ഥയില് വൈറസ് പടരും തുടങ്ങിയ വിവധ കാര്യങ്ങളിലും പഠനം നടത്തണം. ദേശീയതലത്തില് ഗവേഷണം നടത്താന് സംസ്ഥാനസര്ക്കാര് ആവശ്യപ്പെടും. സംസ്ഥാനസര്ക്കാരും ഇത് സംബന്ധിച്ച് ഗവേഷണം നടത്തും. കാര്ഷിക സര്വ്വകലാശാലയും, ഫോറസ്റ്റ് റിസര്ച്ച് ഇന്സ്റ്റിറ്റ്യൂട്ട്, മൃഗസംരക്ഷണ വകുപ്പിനെയെല്ലാം ഇതിനായി ചുമതലപ്പെടുത്തി വിവിധ വകുപ്പുകള് ഏകോകിപ്പിക്കും. സന്നദ്ധസേവനതല്പ്പരരായ ആളുകള്, കുടുംബശ്രീ പ്രവര്ത്തകര്, എല്ലാവരുടേയും സഹകരണത്തോട് കൂടിയാകും ഗവേഷണം നടത്തുകയെന്നും മുഖ്യമന്ത്രി പറഞ്ഞു.
ജന്മഭൂമി ഓണ്ലൈന്