വയനാട്: സുരേഷ് ഗോപി എം.പിയുടെ പ്രദേശിക വികസന ഫണ്ടില് നിന്നും പണമനുവദിച്ചിട്ടും പാലം പണി നടത്താതെ പൊതുമരാമത്ത് വകുപ്പ്. പതിനഞ്ച് ദിവസത്തിനുള്ളില് നിര്മ്മാണം തുടങ്ങിയില്ലെങ്കില് ഫണ്ട് പിന്വലിക്കുമെന്ന് ജില്ലാ കളക്ടര്ക്ക് സുരേഷ് ഗോപി മുന്നറിയിപ്പ് നല്കി. വയനാട് കോട്ടത്തറയിലെ മാങ്കോട്ടുകുന്ന് ഗ്രാമത്തിലെ പാലം നിര്മ്മാണത്തിലാണ് പൊതുമരാമത്ത് ചിറ്റമ്മനയം കാണിക്കുന്നത്.
ചുറ്റും വെള്ളം പൊങ്ങുന്നതിനാല് മഴക്കാലത്ത് മാങ്കോട്ടുകുന്നിലെ കുട്ടികള് സ്കൂളില് പാകാറില്ല. മഴയില് മാസങ്ങളോളം ഗ്രാമത്തിലുള്ള മുഴുവന് ആളുകളും ഒറ്റപ്പെടുന്നത് നിത്യസംഭവമാണ്.. ഇവരുടെ ദുരിതത്തെ കുറിച്ച് അറിഞ്ഞ സുരേഷ് ഗോപി കഴിഞ്ഞ ജൂലൈയിലാണ് നടപ്പാലത്തിനായി 35 ലക്ഷം രൂപ അനുവദിച്ചത്.
എംപിയുടെ പ്രാദേശിക വികസന ഫണ്ടില് നിന്നുമുള്ള തുക ഉപയോഗിച്ച് ഒരു വര്ഷത്തിനുള്ളില് പണി തീര്ക്കണമെന്നായിരുന്നു നിര്ദ്ദേശം. വര്ഷം ഒന്നു കഴിയാറായെങ്കിലും ഫയല് നീങ്ങിയിട്ട് പോലുമില്ല. ഇതോടെയാണ് പതിനഞ്ച് ദിവസത്തിനുള്ളില് പണി തുടങ്ങിയില്ലെങ്കില് ഫണ്ട് പിന്വലിക്കുമെന്ന് എംപി ജില്ലാ കളക്ടര്ക്ക് താക്കീത് നല്കിയത്.
പദ്ധതി നടപ്പിലാക്കേണ്ട പൊതുമരാമത്ത് ഉദ്യോഗസ്ഥര് നിഷേധ നിലപാട് സ്വീകരിക്കുന്നുവെന്നാണ് നാട്ടുകാരുടെ പരാതി. ഒരാഴ്ച്ചക്കുള്ളില് ഫയല് നീങ്ങിയില്ലെങ്കില് ഉദ്യോഗസ്ഥരെ ഉപരോധിക്കുമെന്ന് നാട്ടുകാര് പറഞ്ഞു.
