തലശ്ശേരി: വധശ്രമക്കേസില്‍ എ.എന്‍.ഷംസീര്‍ എംഎല്‍എക്കെതിരെ ഗുരുതര ആരോപണവുമായി വടകരയില്‍ സ്വതന്ത്രനായി മല്‍സരിച്ച മുന്‍ സിപിഎം ലോക്കല്‍ കമ്മറ്റി അംഗവും തലശ്ശേരി മുന്‍സിപ്പല്‍ കൗണ്‍സിലറുമായിരുന്ന സി.ഒ.ടി.നസീര്‍. തന്നെ കൊലപ്പെടുത്താന്‍ ഗൂഢാലോചന നടത്തിയത് എംഎല്‍എയാണെന്ന് നസീര്‍ സ്വകാര്യ ടെലിവിഷന്‍ ചാനലിന് നല്‍കിയ അഭിമുഖത്തില്‍ ഇന്നലെ വ്യക്തമാക്കി.
ഇക്കാര്യം പോലീസിനെ അറിയിച്ചിട്ടും കേസ് അട്ടിമറിക്കാനാണ് അവര്‍ ശ്രമിക്കുന്നത്. ഷംസീറിനെതിരെ ഹൈക്കോടതിയെ സമീപിക്കുമെന്നും നസീര്‍ പറഞ്ഞു. തന്നെ ആക്രമിക്കാന്‍ തലശേരിയിലെ ജനപ്രതിനിധിയും രണ്ടു ലോക്കല്‍ കമ്മറ്റിയംഗങ്ങളും ഗൂഢാലോചന നടത്തിയെന്ന് ആദ്യ ഘട്ടത്തില്‍ നസീര്‍ വ്യക്തമാക്കിയിരുന്നു.
മുന്‍ സിപിഎം പ്രാദേശിക നേതാവ് കൂടിയായ നസീറിനെ കഴിഞ്ഞ മാസം 18ന് രാത്രിയിലാണ് മൂന്നംഗ സംഘം തലശേരിയില്‍ വച്ച് ആക്രമിച്ചത്. സുഹൃത്തും മുന്‍ എസ്എഫ്‌ഐ നേതാവുമായ സി.എച്ച്.നൗറിഫിനൊപ്പം സ്വന്തം വീട്ടിലേക്ക് മടങ്ങുന്നതിനിടെയാണ് നസീര്‍ ആക്രമിക്കപ്പെട്ടത്. കേസില്‍ രണ്ട് സിപിഎം പ്രവര്‍ത്തകര്‍ നേരത്തെ അറസ്റ്റിലായിരുന്നു. ആക്രമണത്തില്‍ പാര്‍ട്ടിക്ക് പങ്കില്ലെന്ന് സിപിഎം കണ്ണൂര്‍ ജില്ലാ സെക്രട്ടറി എം.വി.ജയരാജനും പി.ജയരാജനും അവകാശപ്പെട്ടതിന് പിന്നാലെയായിരുന്നു അറസ്റ്റ്.
പാര്‍ട്ടിയില്‍ വിമതസ്വരം ഉയര്‍ത്തുകയും പ്രാദേശികമായി സമാന ചിന്താഗതിക്കാരെ സംഘടിപ്പിക്കുകയും ചെയ്തതു മുതല്‍ പാര്‍ട്ടിയുടെ ചില പ്രാദേശിക നേതാക്കള്‍ക്ക് നസീര്‍ ശത്രുവായി മാറുകയായിരുന്നു. വടകരയില്‍ മത്സരത്തിനിറങ്ങിയത് ശത്രുത വര്‍ദ്ധിപ്പിക്കുകയും അക്രമത്തിലേക്കെത്തിക്കുകയുമായിരുന്നു. പ്രചാരണത്തിനിടെ രണ്ടുവട്ടം നസീറിനെ കയ്യേറ്റം ചെയ്യാന്‍ ശ്രമമുണ്ടായിരുന്നു. ഭീഷണി കോളുകള്‍ വരുന്നതായും നസീര്‍ പലപ്പോഴായി സുഹൃത്തുക്കളോട് വെളിപ്പെടുത്തുകയുണ്ടായി.
കേസിന്റെ അന്വേഷണം അട്ടിമറിക്കുന്നത് ആഭ്യന്തര മന്ത്രികൂടിയായ മുഖ്യമന്ത്രി പിണറായി വിജയന്റെ പ്രിയപ്പെട്ടവനായ ജനപ്രതിനിധിക്കുവേണ്ടിയാണെന്ന് ചൂണ്ടിക്കാട്ടി കേന്ദ്ര വിദേശ-പാര്‍ലമെന്ററികാര്യ സഹമന്ത്രി വി.മുരളീധരന്‍ കഴിഞ്ഞ ദിവസം രംഗത്തു വന്നിരുന്നു. തങ്ങള്‍ തന്നെ നടത്തിയ വിലയിരുത്തലുകളെയും ജനഹിതത്തെയും അല്‍പ്പമെങ്കിലും വിലവെക്കുന്നെങ്കില്‍ നസീര്‍ വധക്കേസ് അന്വേഷണം അട്ടിമറിക്കാന്‍ ശ്രമിക്കുന്നതിനു പകരം ഇതിനു പിന്നില്‍ പ്രവര്‍ത്തിച്ചവരെ കണ്ടെത്താനും അവര്‍ക്കെതിരേ മുഖം നോക്കാതെ നടപടിയെടുക്കാനും സിപിഎമ്മും അവര്‍ നയിക്കുന്ന സര്‍ക്കാരും തയാറാകണമെന്നും അദ്ദേഹം ആവശ്യപ്പെട്ടു.
