കൊച്ചി: മതം മാറ്റത്തിനും ഭീകര പ്രവര്‍ത്തനങ്ങള്‍ക്കുള്ള റിക്രൂട്‌മെന്റിനും ഭീഷണിയായി ശക്തമായ പ്രവര്‍ത്തനം കാഴ്ചവയ്‌ക്കുന്ന തൃപ്പൂണിത്തുറയിലെ ആര്‍ഷ വിദ്യാ സമാജത്തിനെതിരെ വീണ്ടും കള്ളപ്രചരണവും ഭീഷണി സന്ദേശങ്ങളും. തീവ്രവാദ സംഘടനകളുമായി ബന്ധമുള്ള ചാനലിന്റെ നേതൃത്വത്തിലാണ് കള്ള പ്രചരണം.
ഈസ്റ്റര്‍ ദിനത്തില്‍ ശ്രീലങ്കയില്‍ ഉണ്ടായ സ്ഫോടനത്തെ തുടര്‍ന്ന് അതിലെ ഭീകരര്‍ക്ക് കേരളവുമായി ബന്ധമുണ്ടായിരുന്നു എന്ന് തെളിഞ്ഞിരുന്നു. എന്‍ഐഎയുടെ നേതൃത്വത്തില്‍ ഇപ്പോള്‍ കേരളത്തില്‍ അന്വേഷണങ്ങള്‍ പുരോഗമിക്കുകയാണ്. അതില്‍ നിന്നും ശ്രദ്ധ തിരിച്ചു വിടാനും മത തീവ്രവാദികളുടെ രാജ്യവിരുദ്ധ – ഹിന്ദുവിരുദ്ധ പ്രവര്‍ത്തനങ്ങള്‍ക്ക് മറപിടിക്കാനുമാണ് ആര്‍ഷ വിദ്യാ സമാജത്തിനെതിരെ കുപ്രചരണം.
ലൗ ജിഹാദില്‍ പെട്ട് ഹിന്ദു പെണ്‍കുട്ടിയെ സ്വന്തം ചേച്ചി ആര്‍ഷ വിദ്യാ സമാജത്തിന്റെ കൗണ്‍സിലങ് സെന്ററില്‍ കൊണ്ടു വന്നിരുന്നു. സമാജം പ്രവര്‍ത്തകര്‍ക്കുള്ള ക്യാമ്പ് നടക്കുന്നതിനാല്‍ പുറത്തുള്ളവര്‍ക്ക് കൗണ്‍സലിംഗ് ഇല്ല എന്നതിനാല്‍ സഹോദരിമാര്‍ തിരികെ പോയി. സഹോദരിമാര്‍ തമ്മില്‍ വാക്കു തര്‍ക്കം ഉണ്ടായതു കണ്ട് സംശയം തോന്നിയ പ്രദേശവാസികള്‍ അവരെ തടഞ്ഞു. പോലീസിന്റെ അന്വേഷണത്തില്‍ സത്യം ബോദ്ധ്യപ്പെട്ടതിനെ തുടര്‍ന്ന് കുട്ടികളെ വീട്ടിലേക്ക് അയച്ചു.
വസ്തുതകള്‍ വിശദീകരിച്ച് സമാജത്തിന്റെ പ്രവര്‍ത്തകര്‍ ഫേസ്ബുക്ക് പോസ്റ്റ് ഇട്ടു. പ്രശ്നത്തില്‍ ഉള്‍പ്പെട്ട പെണ്‍കുട്ടികളില്‍ മൂത്ത സഹോദരിയും നിജസ്ഥിതി വെളിപ്പെടുത്തി വീഡിയോ പോസ്റ്റ് ചെയ്തു. ഈ വിഷയത്തെ വലിയ സംഭവമായി ഉയര്‍ത്തിക്കാട്ടിയാണ് വ്യാജപ്രചരണം.
ഇതിനിടെ ആര്‍ഷ വിദ്യാ സമാജം അടച്ചുപൂട്ടണമെന്നും ഇല്ലെങ്കില്‍ ഗുരുതരമായ ഭവിഷ്യത്ത് നേരിടുമെന്നും ഉള്ള ഭീഷണികളും വന്നു. നെറ്റ് ഫോണിലൂടെയാണ് ഭീഷണി. ഭീഷണിയെ ഗൗരവത്തില്‍ കാണുന്നതായും ബന്ധപ്പെട്ടവര്‍ക്ക് പരാതി നല്‍കിയിട്ടുണ്ടെന്നും ആര്‍ഷ വിദ്യാ സമാജം പ്രവര്‍ത്തകര്‍ വ്യക്തമാക്കി.
