ന്യൂദല്ഹി: ഇഷ്ടക്കാരിയായ യൂറോപ്യന് സ്ത്രീയെ വ്യോമസേനാ വിമാനം അയച്ച് ഇന്ത്യയിലേക്ക് കൊണ്ടുവന്ന ജവഹര്ലാല് നെഹ്റുവില് തുടങ്ങുന്നു കോണ്ഗ്രസിന്റെ അപചയമെന്ന് ബിജെപി നേതാവും രാജ്യസഭാംഗവുമായ സുബ്രഹ്മണ്യന് സ്വാമി.
യുദ്ധക്കപ്പലായ ഐഎന്എസ് വിരാടില് മുന് പ്രധാനമന്ത്രി രാജീവ് ഗാന്ധിയും കുടുംബവും ഒഴിവുകാലം ചെലവിട്ടു എന്ന് പ്രധാനമന്ത്രി നരേന്ദ്ര മോദി ആരോപണമുന്നയിച്ചതിനു തൊട്ടുപിന്നാലെ സുബ്രഹ്മണ്യന് സ്വാമി ട്വിറ്ററിലൂടെയാണ് നെഹ്റുവിന്റെ അധികാര ദുര്വിനിയോഗം ഓര്മിപ്പിച്ചത്.
സ്വാമിയുടെ ട്വിറ്റര് കുറിപ്പ് ഇങ്ങനെ: 1950ല് തന്റെ ഇഷ്ടക്കാരിയായ യുറോപ്യന് സ്ത്രീകളിലൊരാളെ കൊണ്ടുവരാന് വ്യോമസേനാ വിമാനം അയയ്ക്കാന് നെഹ്റു ആഗ്രഹിച്ചു. അന്ന് എന്റെ ഭാര്യയുടെ അച്ഛന് ജെ.ഡി. കപാഡിയ പ്രതിരോധ സെക്രട്ടറിയായിരുന്നു. നെഹ്റുവിന്റെ ആവശ്യം തള്ളിയ അദ്ദേഹത്തെ സ്ഥലംമാറ്റി. പുതിയ സെക്രട്ടറി നെഹ്റുവിന്റെ ആവശ്യം അംഗീകരിച്ചു. അന്നു തുടങ്ങി അപചയം.
സ്വകാര്യ ടാക്സിയായി ഐഎന്എസ് വിരാടിനെ രാജീവ് ഗാന്ധി ഉപയോഗിച്ചു എന്ന് പ്രധാനമന്ത്രി നരേന്ദ്ര മോദി പറഞ്ഞപ്പോഴാണ് നെഹ്റുവിന്റെ ചെയ്തി ഓര്മവന്നതെന്നും സ്വാമി പറയുന്നു.
