ബങ്കുര: സ്വന്തം രാജ്യത്തിന്റെ പ്രധാനമന്ത്രിയെ അംഗീകരിക്കാന്‍ മടിക്കുന്ന മമത പാകിസ്ഥാന്‍ പ്രധാനമന്ത്രിയുടെ പേര് പറയുന്നത് അഭിമാനമായി കാണുന്നുവെന്ന് പ്രധാനമന്ത്രി നരേന്ദ്രമോദി. ബംഗാളിലെ ബങ്കുരയില്‍ തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
‘ദീദി ഇപ്പോള്‍ വളരെ ആശങ്കാകുലയാണ്. എനിക്ക് നേരെ കല്ലെറിയുന്നതിനെക്കുറിച്ചും എന്നെ തല്ലുന്നതിനെ കുറിച്ചുമെല്ലാമാണ് അവരിപ്പോള്‍ സംസാരിക്കുന്നത്. ഇതിപ്പോള്‍ എനിക്ക് ശീലമായി. നിങ്ങളുടെ ശകാരങ്ങളില്‍ നിന്നും എനിക്ക് പ്രതിരോധ ശേഷി ലഭിച്ചിരിക്കുകയാണെന്നും’ മോദി പറഞ്ഞു. ജനാധിപത്യം മോദിയുടെ കരണത്തടിക്കുമെന്ന മമത ബാനര്‍ജിയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
‘ദീദി നമ്മുടെ രാജ്യത്തെ ഭരണഘടനയെ അപമാനിച്ചു കൊണ്ടിരിക്കുകയാണ്. ഇന്ത്യയുടെ പ്രധാനമന്ത്രിയെ അംഗീകരിക്കാന്‍ തയാറല്ലെന്ന് അവര്‍ പരസ്യമായി പറഞ്ഞു. അതേസമയം പാകിസ്ഥാന്റെ പ്രധാനമന്ത്രിയെ പ്രധാനമന്ത്രിയായി അംഗീകരിക്കുന്നതില്‍ അവര്‍ അഭിമാനം കൊളളുകയാണ്. ബിജെപിയുടെ റാലി തടസ്സപ്പെടുത്തുന്നതിനായി തൃണമൂല്‍ സര്‍ക്കാര്‍ പരമാവധി ശ്രമിച്ചു. പക്ഷേ നിങ്ങളുടെ അനുഗ്രഹം എന്നോടൊപ്പമുണ്ടെങ്കില്‍ ഇവിടെ വരുന്നതില്‍ എന്നെ ആര്‍ക്കും തടയാനാകില്ലെന്നും പ്രധാനമന്ത്രി പറഞ്ഞു.
പശ്ചിമബംഗാളിനെ മമത നശിപ്പിക്കാന്‍ ശ്രമിക്കുകയാണെന്നും, സ്വന്തം താത്പര്യങ്ങള്‍ സംരക്ഷിക്കാനും അധികാരം നിലനിര്‍ത്തുന്നതിലും മാത്രമാണ് മമതയുടെ ശ്രദ്ധയെന്നും പ്രധാനമന്ത്രി ആരോപിച്ചു. ‘സര്‍ക്കാരിന്റെ കടുത്ത നയങ്ങളില്‍ കൂടി മമത ബാനര്‍ജി ബംഗാളിനെ നശിപ്പിച്ചു കൊണ്ടിരിക്കുകയാണ്. തന്റെ കയ്യില്‍ നിന്ന് അധികാരം വഴുതിപ്പോകുന്നുവെന്ന് കണ്ട് ഇപ്പോള്‍ അതിനെ കൂടുതലായി നശിപ്പിക്കാനാണ് ശ്രമിച്ചു കൊണ്ടിരിക്കുന്നത്. സ്വന്തം താത്പര്യങ്ങളും, അധികാരവും, ബന്ധുക്കളേയും മാത്രമാണ് അവര്‍ ശ്രദ്ധിക്കുന്നത്. മറ്റാരേയും പരിഗണിക്കുന്നില്ലെന്നും പ്രധാനമന്ത്രി പറഞ്ഞു.
ബംഗാളിലെ ബങ്കുര ഉള്‍പ്പെടുന്ന ലോക്സഭ മണ്ഡലത്തില്‍ ഈ മാസം 12നാണ് അടുത്ത ഘട്ടം വോട്ടെടുപ്പ്.
