ബെംഗളൂരു: കഞ്ചാവ് വിതരണത്തിലെ സാമ്പത്തിക തര്ക്കത്തെ തുടര്ന്ന് യുവാവിനെ മര്ദ്ദിച്ച സംഭവത്തില് മുന് എസ്പിയുടെ മകന് ഉള്പ്പെടെ ഏഴു മലയാളികള് ബെംഗളൂരുവില് പിടിയിലായി.
റിട്ട എസ്പി: ബാലചന്ദ്രന്റെ മകനും നിരവധി ക്രിമിനല് കേസുകളിലെ പ്രതിയുമായ തിരുവനന്തപുരം കവടിയാര് സ്വദേശി നിഖില് ബാലചന്ദ്രന്(27), ബെംഗളൂരുവില് താമസിക്കുന്ന മലയാളികളായ ദൊഡ്ഡ കമ്മനഹള്ളിയിലെ സ്റ്റീഫന് രാജ് (25), ഹൊറമാവിലെ എല്. വേണു മാധവ് (22), ഹൊസകോട്ടയിലെ പ്രേം മഹാദേവ് (26), ഹൊയ്സാല നഗറിലെ കെ.എ. അനുഘോഷ് (22), ബെട്ടദാസനപുരയിലെ എം.ജി. രാഹുല് (25), കോറമംഗലയിലെ എസ്.എസ്. മധുപന് (24) എന്നിവരെയാണ് കോറമംഗല പോലീസ് ആവളഹള്ളിയില്നിന്നും പിടികൂടിയത്.
സംഘത്തില്നിന്നും അഞ്ചു കിലോ കഞ്ചാവും കാറും പോലീസ് പിടിച്ചെടുത്തു. കഞ്ചാവ് വിതരണത്തിലെ സാമ്പത്തിക തര്ക്കത്തെ തുടര്ന്ന് ഏപ്രില് 22ന് സംഘത്തില് ഉള്പ്പെട്ട മധുപനിനെ വീട്ടില് കയറി ആക്രമിച്ച് തട്ടികൊണ്ടുപോയി മര്ദ്ദിച്ച് വഴിയില് ഉപേക്ഷിച്ചിരുന്നു.
ഈ സംഭവം മധുപന്റെ അയല്വാസികള് കോറമംഗല പോലീസില് അറിയിച്ചു. പരിക്കേറ്റ് ചികിത്സയില് കഴിയുന്ന മധുപനെ പോലീസ് ചോദ്യം ചെയ്തതോടെയാണ് സംഘത്തെ കുറിച്ച് വിവരം ലഭിക്കുന്നത്. തുടര്ന്നുള്ള അന്വേഷണത്തിലാണ് മറ്റുള്ളവര് പിടിയിലായത്.
തുടക്കത്തില് പരാതിയില്ലെന്ന് പറഞ്ഞ് മധുപന് രക്ഷപ്പെടാന് ശ്രമിച്ചിരുന്നെങ്കിലും പോലീസ് ചോദ്യം ചെയ്യലില് വിവരങ്ങള് പറയുകയായിരുന്നു.
തിരുവനന്തപുരത്ത് രജിസ്ട്രര് ചെയ്തിരുന്ന കേസില് 2016 ജനുവരിയില് നിഖിലിനെ എറണാകുളം ഇടപ്പള്ളിയില് വെച്ച് പോലിസ് പിടികൂടിയിരുന്നു. പിന്നീട് രക്ഷപ്പെട്ട ഇയാള്ക്കെതിരെ കോയമ്പത്തൂരിലും കേസുണ്ട്.
