തിരുവനന്തപുരം: കാസര്കോട് തൃക്കരിപ്പൂരിലെ കള്ളവോട്ടില് സിപിഎം പ്രവര്ത്തകന് ചീമേനി കാരക്കാട് കുതിരുകാരന് വീട്ടില് ശ്യാംകുമാറിനെതിരെ കേസെടുക്കാന് മുഖ്യ തെരഞ്ഞെടുപ്പ് ഓഫീസറുടെ നിര്ദ്ദേശം. ഇയാള് 48-ാം നമ്പര് ബൂത്തില് കള്ളവോട്ട് ചെയ്തെന്ന കളക്ടറുടെ റിപ്പോര്ട്ട് പ്രകാരമാണ് നടപടി. കുറ്റക്കാരായ പോളിങ് ഉദ്യോഗസ്ഥര്ക്കെതിരെ അന്വേഷണം നടത്തി ഏഴുദിവസത്തിനകം റിപ്പോര്ട്ട് നല്കാനും ടിക്കാറാം മീണ കളക്ടര്ക്ക് നിര്ദ്ദേശം നല്കി.
വൈകിട്ട് 6.20നും 7.26 നും രണ്ടുതവണ ശ്യാംകുമാര് ബൂത്ത് നമ്പര് 48ല് വോട്ട് ചെയ്തിട്ടുണ്ടെന്ന് കളക്ടറുടെ റിപ്പോര്ട്ടില് പറയുന്നു. ബൂത്തിലെ തിരക്ക് കാരണം വോട്ടിങ് വേഗത്തിലാകാന് അധികമായി നിയോഗിച്ചിരുന്ന ഫസ്റ്റ് പോളിങ് ഓഫീസറുടെ മുന്നിലാണ് ശ്യാംകുമാര് രണ്ടുതവണയും മഷി പുരട്ടിയത്. എല്ലാസമയത്തും നാലോ അഞ്ചോ പോളിങ് ഏജന്റുമാര് ഉണ്ടായിരുന്നെങ്കിലും ആരും ഈ സംഭവം എതിര്ത്തില്ലെന്നും റിപ്പോര്ട്ട് ചൂണ്ടിക്കാട്ടുന്നു.
ജനപ്രാതിനിധ്യനിയമത്തിലെ സെക്ഷന് 171 സി ഡിഎഫ് പ്രകാരം വരണാധികാരിയായ ജില്ലാ കളക്ടര് പോലീസില് പരാതി നല്കാനാണ് മുഖ്യ തെരഞ്ഞെടുപ്പ് ഓഫീസറുടെ നിര്ദ്ദേശം. അന്വേഷണം നടത്തണമെന്നും നിര്ദ്ദേശിച്ചു.
പോളിങ് ഉദ്യോഗസ്ഥര്, അസിസ്റ്റന്റ്റിട്ടേണിംഗ് ഓഫീസര്, സെക്ടറല് ഓഫീസര് എന്നിവരുടെ മൊഴി രേഖപ്പെടുത്തിയാണ് കളക്ടര് റിപ്പോര്ട്ട് തയാറാക്കിയത്. ദൃശ്യങ്ങളില് കണ്ടയാള് ശ്യാംകുമാര് എന്നയാളാണെന്ന് ബൂത്ത് ലെവല് ഓഫീസര്, സെക്ടറല് ഓഫീസര് എന്നിവര് തിരിച്ചറിഞ്ഞതിനെത്തുടര്ന്ന് ഇയാളില്നിന്ന് മൊഴിയെടുത്തിരുന്നു.
ജന്മഭൂമി ഓണ്ലൈന്