കൊച്ചി: സിറോ മലബാര്‍ സഭ മേജര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ജോര്‍ജ് ആലഞ്ചേരിക്ക് എതിരായി സമര്‍പ്പിച്ച ബാങ്ക് രേഖകള്‍ വ്യാജമെന്ന് കണ്ടെത്തിയ സാഹചര്യത്തില്‍ മൂന്ന് വൈദികരെക്കൂടി അന്വേഷണ സംഘം ചോദ്യം ചെയ്യും. ഫാ. പോള്‍ തേലക്കാടിനെ ചോദ്യം ചെയ്യും. ബിഷപ്പ് ജേക്കബ് മനന്തോടത്തിന്റെ മൊഴിയെടുക്കും. ചോദ്യം ചെയ്യേണ്ട 10 വിമത വൈദികരുടെ പട്ടിക അന്വേഷണ സംഘം തയാറാക്കി.
ഭൂമിയിടപാടില്‍ കര്‍ദിനാളിന്റെ അക്കൗണ്ടിലൂടെ രഹസ്യ ഇടപാടുകള്‍ നടന്നെന്നായിരുന്നു ആരോപണമുയര്‍ന്നത്. കര്‍ദിനാളിന് അക്കൗണ്ടില്ലെന്ന് പോലീസ് കണ്ടെത്തി. കര്‍ദിനാളിന്റെ നടപടികളോട് വിരോധമുള്ളവരാണ് വ്യാജരേഖയ്‌ക്ക് പിന്നിലെന്ന് സൂചന ലഭിച്ചു. ഇതേത്തുടര്‍ന്ന് കര്‍ദിനാള്‍ വിരുദ്ധ നിലപാടുള്ള ചില സംഘടനാ നേതാക്കളില്‍ നിന്ന് അന്വേഷണ സംഘം മൊഴിയെടുക്കും.
കേസിലെ പരാതിക്കാരന്‍ ഫാ. ജോബി മാപ്രക്കാവിലിന്റെ രഹസ്യ മൊഴിയും കോടതി രേഖപ്പെടുത്തി. സിനഡ് നിര്‍ദേശ പ്രകാരമായിരുന്നു പരാതിയെന്നാണ് വിശദീകരണം. ഫാ. പോള്‍ തേലക്കാട്ട്, തനിക്ക് ലഭിച്ച കര്‍ദിനാള്‍ ആലഞ്ചേരിയുടെ പേരിലുള്ള സ്വകാര്യ ബാങ്ക് സ്റ്റേറ്റ്‌മെന്റ് എറണാകുളം-അങ്കമാലി അതിരൂപത അപ്പസ്തോലിക് അഡ്മിനിസ്ട്രേറ്റര്‍ മാര്‍ ജേക്കബ് മനത്തോടത്തിന് കൈമാറി. അദ്ദേഹം ആധികാരികത പരിശോധിക്കാന്‍ അത് ആലഞ്ചേരിക്കു നല്‍കി. ആലഞ്ചേരി അത് സിനഡിന് സമര്‍പ്പിച്ചു. ബാങ്ക് അക്കൗണ്ട് തന്റേതല്ലെന്ന് വ്യക്തമാക്കി. തുടര്‍ന്നാണ് പിന്നില്‍ പ്രവര്‍ത്തിച്ചവരെ കണ്ടെത്താന്‍ പോലീസില്‍ പരാതി നല്‍കിയത്.
തേലക്കാടിനേയും മനത്തോടത്തിനേയും പ്രതിചേര്‍ത്ത് എഫ്‌ഐആര്‍ രജിസ്റ്റര്‍ ചെയ്തു. രേഖയുടെ ആധികാരികത പരിശോധിക്കാന്‍ നല്‍കിയതാണെന്നായിരുന്നു കേസില്‍ അവരുടെ വിശദീകരണം. കേസ് റദ്ദാക്കാന്‍ ഇവര്‍ ഹൈക്കോടതിയെ സമീപിച്ചെങ്കിലും ഫലമുണ്ടായില്ല.
