പാരീസ്: ഫ്രഞ്ച് ലീഗ് ഫുട്ബോളില് പിഎസ്ജിക്ക് കിരീടം. തങ്ങളുടെ 33-ാം മത്സരത്തില് മൊണാക്കോയെ ഒന്നിനെതിരെ മൂന്ന് ഗോളുകള്ക്ക് തകര്ത്താണ് പിഎസ്ജി തുടര്ച്ചയായ രണ്ടാം തവണയും ലീഗ് വണ്ണില് ചാമ്പ്യന്മാരായത്. അഞ്ച് കളികള് അവശേഷിക്കെയാണ് പിഎസ്ജി കിരീടം ഉറപ്പിച്ചത്. രണ്ടാമതുള്ള ലില്ലെയ്ക്ക് 33 കളികളില് നിന്ന് 65 പോയിന്റ് മാത്രമാണുള്ളത്. ലില്ലെ കഴിഞ്ഞ കളിയില് ടോളൂസിനോട് ഗോള്രഹിത സമനില വഴങ്ങിയതും പിഎസ്ജിയുടെ കിരീടധാരണം നേരത്തെയാക്കി. ലീഗ് വണ്ണിന്റെ ചരിത്രത്തില് എട്ടാം തവണയാണ് പിഎസ്ജി കിരീടം നേടുന്നത്.
കഴിഞ്ഞ ഏഴ് സീസണുകളില് ആറാം തവണയാണ് പാരിസ് ക്ലബ് ഫ്രഞ്ച് ലീഗ് വണ് കിരീടം നേടുന്നത്. 2016-17 സീസണില് മാത്രമാണ് അവര്ക്ക് കിരീടം നേടാന് കഴിയാതിരുന്നത്. ശനിയാഴ്ച ഫ്രഞ്ച് ലീഗ് കപ്പില് റെന്നെയെ നേരിടുന്ന പിഎസ്ജിക്ക് ആഭ്യന്തര ഡബിള് തികയ്ക്കാനുള്ള അവസരവുമുണ്ട്.
മൊണാക്കോയ്ക്കെതിരായ മത്സരത്തില് എംബപ്പെയുടെ ഹാട്രിക്കാണ് മിന്നുന്ന ജയം പിഎസ്ജിക്ക് സമ്മാനിച്ചത്. പരിക്ക് മാറി തിരിച്ചെത്തിയ നെയ്മറും ഉറുഗ്വെ സൂപ്പര്താരം എഡിസണ് കവാനിയും പകരക്കാരായി മാത്രം കളത്തിലെത്തിയപ്പോള് എംബപ്പെ കളംനിറഞ്ഞു. പന്തടക്കത്തിലും ഷോട്ടുകള് ഉതിര്ക്കുന്നതിലും ഏറെ മുന്നിട്ടുനിന്ന പിഎസ്ജി 15-ാം മിനിറ്റില് ആദ്യ ഗോള് നേടി. മൗസ ഡിയാബി ഒരുക്കിയ അവസരം മുതലെടുത്ത് എംബപ്പെ ബോക്സിന്റെ മധ്യത്തില് നിന്ന് പായിച്ച വലംകാലന് ഷോട്ട് മൊണാക്കോ ഗോളിയെ കീഴടക്കി വലയില് വിശ്രമിച്ചു. ഇതിന് മുന്പ് കളിയുടെ ഏഴാം മിനിറ്റില് മൊണാക്കോയൂടെ റൂണി ലോപ്പസിന്റെ ശ്രമം പിഎസ്ജി ഗോളി രക്ഷപ്പെടുത്തിയിരുന്നു. 19-ാം മിനിറ്റില് എംബപ്പെ വീണ്ടും ഷോട്ട് ഉതിര്ത്തെങ്കിലും മൊണാക്കോ ഗോളി രക്ഷപ്പെടുത്തി.
പിന്നീട് മൊണാക്കോ ഫാല്ക്കാവോയുടെയും മറ്റും നേതൃത്വത്തില് പിഎസ്ജി പ്രതിരോധം പലതവണ പിളര്ത്തിയെങ്കിലും സമനില ഗോള് നേടുന്നതില് പിഴച്ചു. 38-ാം മിനിറ്റില് എംബപ്പെ വീണ്ടും നിറയൊഴിച്ചു. ഇത്തവണ ഡാനി ആല്വസാണ് അവസരമൊരുക്കിയത്. തൊട്ടുപിന്നാലെ ലീഡ് ഉയര്ത്താനുള്ള അവസരം ലഭിച്ചെങ്കിലൂം ഇത്തവണ എംബപ്പെക്ക് പിഴച്ചു. 44-ാം മിനിറ്റില് മൊണാക്കോയുടെ ഗെല്സന് മാര്ട്ടിന്സിന്റെ ഷോട്ടും വലയില് കയറാതിരുന്നതോടെ ആദ്യപകുതിയില് 2-0ന് പിഎസ്ജി മുന്നില്.
രണ്ടാം പകുതിയുടെ തുടക്കത്തില് സൂപ്പര് താരം നെയ്മര് കുര്സാവയ്ക്ക് പകരമായി കളത്തിലെത്തി. 55-ാംമിനിറ്റില് അവര് മൂന്നാം ഗോളും നേടി. ഇത്തവണയും വഴിയൊരുക്കിയത് ഡാനി ആല്വസ്. ഡാനി ബോക്സിലേക്ക് മറിച്ചുനല്കിയ പന്ത് സ്വീകരിച്ച് ഇടംകാലുകൊണ്ട് എംബപ്പെ നിറയൊഴിച്ചപ്പോള് മൊണാക്കോ ഗോളിക്ക് മറുപടിയുണ്ടായില്ല (3-0). അതിനുശേഷം ഒരു ഗോള് തിരിച്ചടിക്കാനായി മൊണാക്കോ താരങ്ങള് കിണഞ്ഞു ശ്രമിച്ചു. ഒടുവില് 80-ാം മിനിറ്റില് അലക്സാണ്ടര് ഗൊലോവിനിലൂടെ അവര് ആശ്വാസ ഗോള് കണ്ടെത്തുകയും ചെയ്തു.
