കോഴിക്കോട് : ഒളിക്യാമറ വിവാദത്തില് കോഴിക്കോട് യുഡിഎഫ് സ്ഥാനാര്ത്ഥി എം.കെ. രാഘവനെതിരെ വിശദമായ അന്വേഷണം വേണമെന്ന് റിപ്പോര്ട്ട്. ഡിസിപി വാഹിദിന്റെ നേതൃത്വത്തിലുള്ള പ്രത്യേക സംഘം നല്കിയ അന്വേഷണ റിപ്പോര്ട്ടിലാണ് ഇക്കാര്യം ആവശ്യപ്പെട്ടിരിക്കുന്നത്.
ഒളിക്യാമറയിലെ ദൃശ്യങ്ങള് കൃത്രിമമല്ലെന്നും ഡിജിപിക്ക് കൈമാറിയ റിപ്പോര്ട്ടില് പറയുന്നുണ്ട്. തെരഞ്ഞെടുപ്പ് കമ്മീഷന് ആവശ്യപ്പെട്ടതിനെ തുടര്ന്നാണ് ദൃശ്യങ്ങളുടെ ആധികാരികത സംബന്ധിച്ച് പോലീസ് അന്വേഷണം നടത്തിയത്. സിങ്കപ്പൂര് കേന്ദ്രീകരിച്ച് പ്രവര്ത്തിക്കുന്ന കമ്പനിക്കെന്ന പേരില് കോഴിക്കോട് ഹോട്ടല് തുടങ്ങാന് സ്ഥലം ഏറ്റെടുത്ത് നല്കണമെന്ന് ആവശ്യപ്പെട്ട് സമീപിച്ച ആളുകളോട് കോഴ ആവശ്യപ്പെടുന്ന ദൃശ്യങ്ങളുടെ ആധികാരികതയാണ് പരിശോധിച്ചത്.
തനിക്കെതിരെ ഉന്നയിക്കപ്പെട്ട കോഴ ആരോപണത്തിന് പിന്നില് സിപിഎം ആണെന്നും ഇത് കെട്ടിച്ചമച്ചതുമാണെന്നാണ് എം.കെ. രാഘവന്റെ വാദം. സംഭവത്തില് മൊഴി നല്കണമെന്നാവശ്യപ്പെട്ട് രാഘവന് രണ്ട് തവണ നോട്ടീസ് അയച്ചിട്ടും ഹാജരായിരുന്നില്ല. പിന്നീട് അന്വേഷണ ഉദ്യോഗസ്ഥര് നേരിട്ടെത്തി മൊഴി രേഖപ്പെടുത്തുകയായിരുന്നു.
