തിരുവനന്തപുരം: ഇപ്പോഴത്തേതിനേക്കാൾ മെച്ചപ്പെട്ട ഭൂരിപക്ഷത്തോടെ എൻഡിഎ അധികാരത്തിൽ തുടരുമെന്ന് ബിജെപി ദേശീയ അധ്യക്ഷൻ അമിത് ഷാ. ഇന്ത്യയുടെ മനസ് പ്രവചിക്കുക എന്നത് ഏത് സർവ്വേ ഏജൻസിക്കും കഠിനമായ കാര്യമാണ്. എന്നാൽ ജനങ്ങളോട് നിരന്തരം ഇടപെടുന്ന ഞങ്ങൾക്ക് അവരുടെ പൾസ് മനസിലാവുമെന്നും അമിത് ഷാ വ്യക്തമാക്കി.
കേരളത്തിൽ ബിജെപി മികച്ച തുടക്കം കുറിക്കാൻ പോവുകയാണ്. കുറഞ്ഞത് അഞ്ച് സീറ്റ് ഈ തെരഞ്ഞെടുപ്പിൽ ബിജെപി നേടും. ഇക്കാര്യം മനസിൽ വച്ചോളൂവെന്നും അമിത് ഷാ പറഞ്ഞു. പിണറായി സർക്കാർ പൂർണ പരാജയമാണ്. പ്രളയത്തെക്കുറിച്ചുള്ള അമിക്കസ് ക്യൂറി റിപ്പോർട്ട് മാത്രം മതി ഇക്കാര്യം വ്യക്തമാക്കാൻ. ഫെഡറൽ സംവിധാനത്തിൽ അവരാണ് ഭരിക്കേണ്ടത്. അവർക്കതിന് കഴിയുന്നില്ലെങ്കിൽ ഞങ്ങളോട് പറഞ്ഞാൽ മതി, ഏറ്റെടുക്കാമെന്നും അമിത് ഷാ വ്യക്തമാക്കി.
കഴിഞ്ഞ അഞ്ചു വർഷം കേരളത്തിന്റെ വികസനത്തിനായി കേന്ദ്ര സർക്കാർ ഒട്ടേറെ നല്ല കാര്യങ്ങൾ ചെയ്തു. ധനകാര്യ കമ്മിഷന്റെ വിഹിതം കൂട്ടി, അടിസ്ഥാന സൗകര്യ വികസനത്തിനും റെയിൽവേ വികസനത്തിനും കാര്യമായ പ്രവർത്തനം കേന്ദ്രസർക്കാർ നടത്തി. എന്നാൽ ഇവിടെ നടക്കുന്ന പ്രചാരണം തിരിച്ചാണ്. കോൺഗ്രസിനോ കമ്യൂണിസ്റ്റ് പാർട്ടികൾക്കോ ഇന്ത്യയെ നയിക്കാൻ കഴിയില്ല എന്ന കാര്യം കേരളത്തിലെ ജനങ്ങൾ ചിന്തിക്കണം. രാജ്യത്തിന് സുരക്ഷിതത്വ ബോധം ഉണ്ടാക്കാൻ അവർക്ക് സാധിക്കില്ല. ഈ തെരഞ്ഞെടുപ്പോടെ രാജ്യത്ത് സിപിഎമ്മും സിപിഐയും ഇല്ലാതാകാൻ പോവുകയാണ്. ബംഗാളിലും ത്രിപുരയിലും അത് സംഭവിച്ചുകഴിഞ്ഞു. കേരളത്തിൽ ഈ തെരഞ്ഞെടുപ്പോടെ ഈ മാറ്റം വിളിച്ചോതുമെന്നും അമിത് ഷാ പറഞ്ഞു.
ഈ തെരഞ്ഞെടുപ്പിൽ എൻഡിഎ സർക്കാർ സമസ്ത മേഖലയിലും കൈവരിച്ച നേട്ടങ്ങളാണ് മുന്നോട്ട് വയ്ക്കുന്നത്. ദേശ സുരക്ഷയാണ് ഞങ്ങൾക്ക് പ്രധാനം. എന്നാൽ കോൺഗ്രസിനും കമ്യൂണിസ്റ്റ് പാർട്ടികൾക്കും അതില്ല. ഉത്തർപ്രദേശിൽ ചില സീറ്റുകൾ മാറിയും മറിഞ്ഞും വരാം. ദക്ഷിണേന്ത്യയിൽ എല്ലായിടത്തും സീറ്റുകൾ കൂടും. കഴിഞ്ഞ തവണ തോറ്റ 60 സീറ്റുകളിലും എൻഡിഎ വിജയിക്കും. ബംഗാളിൽ പകുതിയിലേറെ സീറ്റുകളിൽ ബിജെപി ജയിക്കുമെന്നും അമിത് ഷാ പറഞ്ഞു.
