മലപ്പുറം: പള്ളികളില് സ്ത്രീകളെ പ്രവേശിപ്പിക്കുന്നതിനെതിരെ സമസ്ത രംഗത്ത്. മുസ്ലിം സ്ത്രീകള് സ്വന്തം വീടുകളിലാണ് പ്രാർത്ഥിക്കേണ്ടതെന്ന് സമസ്ത ജനറല് സെക്രട്ടറി കെ.ആലിക്കുട്ടി മുസലിയാര് പറഞ്ഞു. വിശ്വാസസ്വാതന്ത്ര്യത്തില് കോടതി ഇടപെടുന്നതിനെ അംഗീകരിക്കാനാവില്ലെന്നും അദ്ദേഹം വ്യക്തമാക്കി.
ശബരിമല പ്രശ്നത്തിലടക്കം മതനേതാക്കള് പറയുന്നത് അംഗീകരിക്കണം. പള്ളികളില് സ്ത്രീകളെ പ്രവേശിപ്പിക്കണമെന്ന വാദം അംഗീകരിക്കുന്നില്ല. ശബരിമല പ്രശ്നത്തിലടക്കം മതനേതാക്കള് പറയുന്നത് അംഗീകരിക്കണമെന്നും സമസ്ത നിലപാടെടുത്തു. മുസ്ലിം പള്ളികളില് സ്ത്രീകള്ക്കും ആരാധനാ സ്വാതന്ത്ര്യം ആവശ്യപ്പെട്ടുള്ള ഹര്ജി സുപ്രിംകോടതി ഫയലില് സ്വീകരിച്ചു. ശബരിമല കേസിലെ വിധിയുടെ പശ്ചാത്തലത്തില് മാത്രമാണ് ഹര്ജി കേള്ക്കാന് തീരുമാനിക്കുന്നതെന്ന് ജസ്റ്റിസ് എസ് എ ബോബ്ഡെ, ജസ്റ്റിസ് അബ്ദുല് നസീര് എന്നിവര് അടങ്ങിയ ബെഞ്ച് വ്യക്തമാക്കി.
കേസില് കേന്ദ്ര സര്ക്കാര് ഉള്പ്പെടെയുള്ള എതിര്കക്ഷികള്ക്കുനോട്ടീസ് അയയ്ക്കാന് കോടതി ഉത്തരവിട്ടു. ഈ പശ്ചാത്തലത്തിലാണ് നിലപാട് വ്യക്തമാക്കി സമസ്ത രംഗത്ത് എത്തിയത്. ജമാ അത്തെ ഇസ്ലാമിയുടെയും മുജാഹിദിന്റെയും പളളികളില് സ്ത്രീകള്ക്ക് പ്രവേശനം അനുവദിക്കുമ്പോള് സുന്നി പളളിയില് പ്രവേശനം നിഷേധിക്കുന്നുവെന്നാണ് മഹാരാഷ്ട്രയിലെ മുസ്ലിം ദമ്പതികളുടെ പരാതി.
പളളിയില് പ്രവേശിക്കുന്നതില് നിന്ന് ഹര്ജിക്കാരിയെ ആരെങ്കിലും തടയാന് ശ്രമിച്ചോ, മക്കയില് സ്ത്രീകള്ക്ക് പ്രവേശനമുണ്ടോ തുടങ്ങിയ ചോദ്യങ്ങളാണ് ജസ്റ്റിസ് എസ്.എ. ബൊബ്ഡെ അധ്യക്ഷനായ ബെഞ്ചില് നിന്ന് ആദ്യമുണ്ടായത്. മക്കയില് സ്ത്രീകള്ക്ക് പ്രവേശനവിലക്കില്ലെന്നായിരുന്നു ഹര്ജിക്കാരുടെ മറുപടി.
