സമുദായ സമവാക്യങ്ങള്ക്കൊപ്പം പാലയിലേക്ക് വികസനം കൊണ്ടുവന്നാണ് കെ എം മാണി പാലായുടെ സ്വന്തം മാണിക്യമായി ജനമനസില് ഇടം നേടിയത്. പാലയിലെ പ്രധാന കെട്ടിടങ്ങളായ സിവില് സ്റ്റേഷന്, ജനറല് ഹോസ്പിറ്റല്, കെഎസ്ഇബി കെട്ടിടം അടക്കം ഇന്നു കാണുന്ന പല നിര്മിതികളും കെ എം മാണിയുടെ സംഭാവനയാണ്.
സ്വന്തം മണ്ഡലത്തിലേക്ക് പല പദ്ധതികളും വകമാറ്റിയതിന്റെ പേരില് രാഷ്ട്രീയ പരിഹാസങ്ങളും മാണിക്ക് ഏറെ നേരിടേണ്ടി വന്നിട്ടുണ്ട്. റബറിന്റെ രാഷ്ട്രീയമാണ് കെഎം മാണിയുടേതെന്ന് എതിരാളികള് പരിഹസിക്കുമെങ്കിലും മാണിയുടെ രാഷ്ട്രീയ ജീവിതത്തിലെ ഏറ്റക്കുറച്ചിലുകള് റബ്ബര് എന്ന നാണ്യവിളയുമായി ബന്ധപ്പെട്ടു തന്നെ കിടക്കുന്നു.
വിവാദങ്ങള് പിടിച്ചുലച്ചപ്പോള് പാലായില് നടത്തിയ വികസന പ്രവര്ത്തനങ്ങളും നാട്ടുകാരോടുള്ള അടുപ്പവുമാണ് മാണിക്ക് എന്നും തുണയായിട്ടുള്ളത്.പാര്ട്ടി പ്രവര്ത്തകരെയും നാട്ടുകാരെയും കൂടെ നില്ക്കുന്നവരെയുമെല്ലാം അറിയുകയും പിന്നീട് കാണുമ്പോള് അവരുടെ പേരുപോലും ഓര്മിച്ചുവിളിക്കുന്ന അപൂര്വ്വം നേതാക്കളിലൊരാളാണ് കെ എം മാണി.
മണ്ഡലത്തില് നടപ്പാക്കിയ വികസന പ്രവര്ത്തനങ്ങള് കൊണ്ടുതന്നെയാണ് 2016ല് ബിജു രമേശ് ഉയര്ത്തിയ ബാര് കോഴ വിവാദത്തിനിടയിലും 12ാം തവണയും കെ എം മാണിക്ക് പാലായില് നിന്നും ജയിക്കാനായത്.
പ്രതികരിക്കാൻ ഇവിടെ എഴുതുക: