കോട്ടയം: ബിഷപ്പ് ഫ്രാങ്കോ മുളയ്ക്കലിനെതിരെ കുറ്റപത്രം സമര്പ്പിച്ചതില് സന്തോഷമെന്ന് കന്യാസ്ത്രീകള്. പകുതി നീതി കിട്ടിയെന്ന് കുറവിലങ്ങാട് മഠത്തിലെ കന്യാസ്ത്രീകള് പ്രതികരിച്ചു. അന്വേഷണം തൃപ്തികരമാണന്ന് സിസ്റ്റര് അനുപമ പറഞ്ഞു.
കുറ്റപത്രം സമര്പ്പിക്കാന് വൈകുന്നതില് പ്രതിഷേധിച്ച് കന്യാസ്ത്രീകള് സമരത്തിനിറങ്ങാന് ഒരുങ്ങവെയാണ് പോലീസ് കുറ്റപത്രം സമര്പ്പിച്ചിരിക്കുന്നത്. 9 മാസത്തെ അന്വേഷണത്തിനൊടുവിലാണ് 200 പേജുള്ള കുറ്റപത്രം അന്വേഷണ സംഘം പാലാ കോടതിയില് സമര്പ്പിച്ചത്. കര്ദ്ദിനാള് ജോര്ജ് ആലഞ്ചേരിയും നാല് ബിഷപ്പുമാരും ഉള്പ്പടെ കേസില് 83 സാക്ഷികളാണുള്ളത്. മൂന്ന് ബിഷപ്പുമാരുടെയും 11 വൈദികരുടെയും 25 കന്യാസ്ത്രീകളുടെയും മൊഴികളും കുറ്റപത്രത്തിലുണ്ട്.
വൈക്കം ഡിവൈഎസ്പി കെ.സുഭാഷാണ് കുറ്റപത്രം സമര്പ്പിച്ചത്. അന്യായമായി തടഞ്ഞു വച്ചു, അധികാര ദുര്വിനിയോഗം നടത്തി ലൈംഗികമായി പീഡിപ്പിച്ചു, പ്രകൃതിവിരുദ്ധ ലൈംഗിക പീഡനം നടത്തി, ഭീഷണിപ്പെടുത്തി, മേലധികാരം ഉപയോഗിച്ച് തന്റെ നിയന്ത്രണത്തിലുള്ള സ്ത്രീയെ ലൈംഗികമായി ദുരുപയോഗം ചെയ്തു, ഒരേ സ്ത്രീയെ സ്വാധീനം ഉപയോഗിച്ച് തുടര്ച്ചയായി ബലാത്സംഗം ചെയ്തു തുടങ്ങിയ വകുപ്പുകളാണ് ബിഷപ്പിനെതിരെ ചുമത്തിയിരിക്കുന്നത്. ജീവപര്യന്തം വരെ തടവ് ശിക്ഷ കിട്ടുന്ന വകുപ്പുകളാണ് ഇവ.
സാക്ഷികള് കൂറുമാറാതിരിക്കാന് പ്രധാനപ്പെട്ട 10 സാക്ഷികളുടെ രഹസ്യമൊഴി രേഖപ്പെടുത്തിയിട്ടുണ്ട്. ഈ മൊഴി രേഖപ്പെടുത്തിയ ഏഴ് മജിസട്രേറ്റുമാരും സാക്ഷികളാണ്. മൊഴികളെല്ലാം ക്യാമറയിലും പകര്ത്തിയിട്ടുണ്ട്. പ്രതിക്കെതിരെ അന്വേഷണത്തില് കണ്ടെത്തിയ തെളിവുകള് വിശദമായി കുറ്റപത്രത്തില് ഉള്പ്പെടുത്തിയിട്ടുണ്ട്.
കോട്ടയം ജില്ലാ കോടതിയിലായിരിക്കും കേസിലെ പ്രാഥമിക വാദം നടക്കുക.
