തിരുവനന്തപുരം: ഭാരത റെയില്വേയുടെ ഏകീകൃത മൊബൈല് ആപ്ലിക്കേഷനായ റെയില്വണ്ണിന്റെ ഉപയോഗത്തിലൂടെ രാജ്യത്തെ മുന്നിര ഡിവിഷനുകളിലൊന്നായി തിരുവനന്തപുരം ഡിവിഷന് മാറി. ഇതിലൂടെ ദഷിണ റെയല്വേ തിരുവനന്തപുരം ഡിവിഷന് ഡിജിറ്റല് ടിക്കറ്റിങ്ങില് ശ്രദ്ധേയമായ നേട്ടം കൈവരിച്ചു. നിലവില് ഡിവിഷനില് ബുക്ക് ചെയ്യുന്ന അണ്റിസര്വ്ഡ് ടിക്കറ്റുകളില് അഞ്ചില് ഒന്ന് റെയില്വണ് മൊബൈല് ആപ്പ് വഴിയാണ് എടുക്കുന്നത്.
റിസര്വ്ഡ്, അണ്റിസര്വ്ഡ് ടിക്കറ്റ് ബുക്കിങ് ഉള്പ്പെടെ നിരവധി യാത്രാസേവനങ്ങള് ഒരൊറ്റ ആപ്പിലൂടെ ലഭ്യമാക്കുന്ന റെയില്വേയുടെ ഏകീകൃത മൊബൈല് ആപ്പാണ് റെയില്വണ്. ട്രെയിന് സര്വീസ് വിവരങ്ങള്, സമയപ്പട്ടിക, പിഎന്ആര് സ്ഥിതി, കോച്ച് പൊസിഷന് എന്നിവ അറിയുന്നതിനും ഭക്ഷണം ഓര്ഡര് ചെയ്യുന്നതിനും സാധിക്കും. പരാതി പരിഹാര സേവനം ഉപയോഗിക്കുന്നതിനും മറ്റ് യാത്രാസൗഹൃദ സേവനങ്ങള് പ്രയോജനപ്പെടുത്തുന്നതിനും ഈ ആപ്പ് സഹായിക്കുന്നു.
റെയില്വണ് ആപ്പ് വഴി അണ്റിസര്വ്ഡ് ടിക്കറ്റുകള് ബുക്ക് ചെയ്യുന്ന യാത്രക്കാര്ക്ക് ടിക്കറ്റ് നിരക്കില് മൂന്ന് ശതമാനം ഇളവും ലഭിക്കുന്നു. സ്റ്റേഷനില് എത്തുന്നതിന് മുമ്പുതന്നെ അണ്റിസര്വ്ഡ് ടിക്കറ്റുകള് ബുക്ക് ചെയ്യാനുള്ള സൗകര്യം റെയില്വണ് ആപ്പിലൂടെ ലഭ്യമാണ്. ഇതിലൂടെ ടിക്കറ്റ് കൗണ്ടറുകളിലെ ക്യൂ ഒഴിവാക്കി സമയം ലാഭിക്കാം. സ്റ്റേഷനുകളില് പ്രദര്ശിപ്പിച്ചിരിക്കുന്ന പ്രത്യേക ക്യൂആര് കോഡുകള് സ്കാന് ചെയ്ത് അതത് സ്റ്റേഷനെ ആരംഭ സ്റ്റേഷനായി തെരഞ്ഞെടുത്ത് ടിക്കറ്റുകള് എളുപ്പത്തില് എടുക്കാനും കഴിയും.
യാത്രാനുഭവം കൂടുതല് മെച്ചപ്പെടുത്തുകയും റെയില്വേ സേവനങ്ങള് കൂടുതല് എളുപ്പത്തില് ലഭ്യമാക്കുകയും ചെയ്യുന്ന സാങ്കേതികവിദ്യ അധിഷ്ഠിത സംവിധാനങ്ങള് പ്രോത്സാഹിപ്പിക്കുന്നത് തുടരുമെന്ന് തിരുവനന്തപുരം ഡിവിഷന്റെ സീനിയര് കൊമേഴ്സ്യല് മാനേജര് നിതിന് നോര്ബര്ട്ട് പറഞ്ഞു.
