തിരുവനന്തപുരം: 2016ലെ നിയമസഭാ തെരഞ്ഞെടുപ്പില് വയനാട് ജില്ലയിലെ ഏഴു സ്ഥാനാര്ഥികള് നിയമവിരുദ്ധമായി സ്ഥാപിച്ച പ്രചാരണസാമഗ്രികള് നീക്കംചെയ്ത ചെലവ് അവരില്നിന്ന് ഈടാക്കാന് മുഖ്യ തിരഞ്ഞെടുപ്പ് ഓഫീസര് ടീക്കാറാം മീണ ജില്ലാ കളക്ടര്ക്ക് നിര്ദേശം നല്കി. പണമടച്ചില്ലെങ്കില് സ്ഥാനാര്ഥികളെ പ്രോസിക്യൂട്ട് ചെയ്യാനും നിര്ദേശിച്ചു.
വയനാട് ജില്ലയിലെ മാനന്തവാടി, കല്പ്പറ്റ, സുല്ത്താന് ബത്തേരി നിയമസഭാ മണ്ഡലങ്ങളില് നിയമവിരുദ്ധമായി സ്ഥാപിച്ച പോസ്റ്റര്, ബാനര്, ഹോര്ഡിങ്സ് മുതലായവ നീക്കാന് കളക്ടര് വിവിധ സ്ഥാനാര്ഥികള്ക്ക് നോട്ടീസ് നല്കിയിരുന്നു. പലതവണ ആവശ്യപ്പെട്ടിട്ടും മാറ്റാത്തതിനാല് ജില്ലാ ഭരണകൂടം തന്നെ ഇവ നീക്കം ചെയ്തു. ഇതിന്റെ ചെലവ് അതത് സ്ഥാനാര്ഥികളുടെ തെരഞ്ഞെടുപ്പ് ചെലവ് കണക്കിലേക്ക് വരവുവച്ച് അവരോട് തുക അടയ്ക്കാന് കളക്ടര് ആവശ്യപ്പെട്ടിരുന്നു. പലതവണ നോട്ടീസുകള് നല്കിയിട്ടും സ്ഥാനാര്ഥികള് മറുപടി നല്കാതെ തെരഞ്ഞെടുപ്പ് കമ്മീഷന് അപ്പീല് നല്കുകയായിരുന്നു. എന്നാല്, വിശദ പരിശോധനയ്ക്ക് ശേഷം കമ്മീഷന് അപ്പീല് നിരസിച്ചു. ജില്ലാ കളക്ടറുടെ നടപടി ശരിവച്ചു.
പ്രതികരിക്കാൻ ഇവിടെ എഴുതുക: