കോഴിക്കോട്: ഇത് രണ്ടാം തവണയാണ് ബിജെപി സംസ്ഥാന സെക്രട്ടറിമാരിലൊരാളായ അഡ്വ. വി.കെ. സജീവന് ലോക്സഭാ തെരഞ്ഞെടുപ്പില് വടകരയില് നിന്ന് ജനവിധി തേടുന്നത്. 1976 ജനുവരി 14ന് വടകരക്കടുത്ത് വള്ള്യാട് വാണകണ്ടിയില് പരേതരായ കുഞ്ഞപ്പതങ്ങളുടെയും ജാനകി അമ്മയുടെയും രണ്ടാമത്തെ മകനായാണ് ജനനം. സ്കൂള് വിദ്യാഭ്യാസ കാലത്തുതന്നെ ആര്എസ്എസ്സിലൂടെ പൊതുപ്രവര്ത്തനം ആരംഭിച്ച വി.കെ. സജീവന് ആര്എസ്എസ്സിന്റെയും എബിവിപിയുടെയും യുവമോര്ച്ചയുടെയും ബിജെപിയുടെയും വിവിധ ചുമതലകള് വഹിച്ചിട്ടുണ്ട്.
വിദ്യാഭ്യാസ കാലഘട്ടത്തില് എബിവിപി യൂണിറ്റ് സെക്രട്ടറി മുതല് സംസ്ഥാന സമിതി അംഗം വരെയുള്ള ചുമതലകള് വഹിച്ചു. പിന്നീട് യുവമോര്ച്ച മേപ്പയ്യൂര് നിയോജക മണ്ഡലം ജനറല് സെക്രട്ടറിയായി. 1997-1999 കാലയളവില് കൊച്ചി എളമക്കരയിലെ ആര്എസ്എസ് സംസ്ഥാന കാര്യാലയത്തിന്റെ ജോയിന്റ് സെക്രട്ടറിയായി പ്രവര്ത്തിച്ചു. 1999ല് കെ.ടി. ജയകൃഷ്ണന് മാസ്റ്ററുടെ കൊലപാതകത്തിനുശേഷം എറണാകുളത്ത് നടന്ന യുവമോര്ച്ച സംസ്ഥാന സമ്മേളനത്തില് വെച്ച് മുഴുവന്സമയ പ്രവര്ത്തകനായി. തുടര്ന്ന് 12 വര്ഷം യുവമോര്ച്ചയുടെ മുഴുവന്സമയ പ്രവര്ത്തകനായിരുന്നു.
യുവമോര്ച്ച കാസര്ഗോഡ്, കോട്ടയം ജില്ലകളുടെ ഓര്ഗനൈസിംഗ് സെക്രട്ടറി, മേഖലാ ഓര്ഗനൈസിംഗ് സെക്രട്ടറി, സംസ്ഥാന സെക്രട്ടറി, സംസ്ഥാന ജനറല് സെക്രട്ടറി, ദേശീയ സമിതിയംഗം എന്നീ ചുമതലകളും ബിജെപി സംസ്ഥാനസമിതിയംഗം, പാര്ട്ടി ഔദേ്യാഗിക വക്താവ് എന്നീ ചുമതലകളും വഹിച്ചു. 2015 മുതല് ബിജെപി സംസ്ഥാന സെക്രട്ടറിയാണ്. യുവമോര്ച്ചയും ബിജെപിയും നടത്തിയ വിവിധ സമ്മേളനങ്ങളുടെയും സംസ്ഥാനതല ജാഥകളുടെയും കോ-ഓര്ഡിനേറ്ററായും തെരഞ്ഞെടുപ്പുകളില് ഇന്ചാര്ജ്ജായും പ്രവര്ത്തിച്ചിട്ടുണ്ട്.
സംസ്ഥാനവ്യാപകമായി നടത്തിയ സമരങ്ങള്ക്ക് നേതൃത്വം വഹിക്കുകയും പോലീസ് മര്ദ്ദനവും ജയില്വാസവും ഏറ്റുവാങ്ങുകയും ചെയ്തിട്ടുണ്ട്. ശബരിമല സംരക്ഷണ പ്രക്ഷോഭത്തില് കെ.സുരേന്ദ്രന് ശേഷം നിലക്കലില് നിരോധനാജ്ഞ ലംഘിച്ച് അറസ്റ്റ് വരിക്കാന് നേതൃത്വം നല്കി. സെക്രട്ടറിയേറ്റ് നടയില് 49 ദിവസം നടന്ന നിരാഹാര സമരത്തിന്റെ കണ്വീനറായും പ്രവര്ത്തിച്ചു.
2014ലെ ലോക്സഭാ തെരഞ്ഞെടുപ്പില് വടകര മണ്ഡലത്തില് നിന്ന് മത്സരിച്ചു. 2016ലെ നിയമസഭാ തെരഞ്ഞെടുപ്പില് തലശ്ശേരി നിയമസഭാ മണ്ഡലത്തില് മികച്ച മത്സരം കാഴ്ച വെച്ച് കണ്ണൂര് ജില്ലയില് നിന്ന് ആദ്യമായി ഡിപോസിറ്റ് തിരിച്ചുപിടിച്ച ബിജെപി സ്ഥാനാര്ത്ഥിയായി മാറി. 2010ല് എടച്ചേരി ഡിവിഷനില് നിന്ന് കോഴിക്കോട് ജില്ലാപഞ്ചായത്തിലേക്കും 2011ല് കുറ്റ്യാടി മണ്ഡലത്തില് നിന്ന് നിയമസഭയിലേക്കും സ്ഥാനാര്ത്ഥിയായി മത്സരിച്ചു. അഡ്വ. കെ.കെ. സുരേന്ദ്രന്റെ കീഴില് കോഴിക്കോട് ബാറില് അഭിഭാഷകനാണ്.
വടകര വള്ള്യാട് വാണകണ്ടിയില് കീര്ത്തിസത്മം വീട്ടിലാണ് താമസം. ഭാര്യ: സരിത (അസിസ്റ്റന്റ് സ്റ്റേറ്റ് ടാക്സ് ഓഫീസര്, സ്റ്റേറ്റ് ഗുഡ്സ് ആന്റ് ടാക്സ് ഡിപ്പാര്ട്ട്മെന്റ്, തലശ്ശേരി). മകള്: മിത്രാലക്ഷ്മി (രണ്ടാം ക്ലാസ്സ്, മാഹി സെന്ട്രല് സ്കൂള്).
